Gürcüstanda müxalif Droa! partiyasının lideri və “Dəyişiklik Uğrunda Koalisiyası”nın üzvü Elene Xoştariya 1 il 6 ay müddətinə azadlıqdan məhrum edilib.

Qərarı Tbilisi Şəhər Məhkəməsinin hakimi Giorgi Arevadze çıxarıb. Xoştariya Tbilisi meri Kaxa Kaladzenin seçki kampaniyasına aid bannerə zərər vurmaqda təqsirli bilinib. O, nə hökm oxunarkən, nə də ümumilikdə məhkəmə proseslərində iştirak edib və hakimiyyətin heç bir qolunu tanımadığını bildirərək iclaslara qatılmaqdan imtina edib.

Müxalif siyasətçi 15 sentyabr 2025-ci ildə saxlanılıb və Gürcüstan Cinayət Məcəlləsinin 187-ci maddəsinin birinci hissəsi – başqasının əmlakına əhəmiyyətli ziyan vurma maddəsi ilə ittiham olunub. Bu maddə cərimə və ya bir ildən beş ilədək azadlıqdan məhrumetmə cəzası nəzərdə tutur.

Xoştariyaya qarşı 5000 lari məbləğində girov qətimkan tədbiri seçilsə də, o, girovu ödəməkdən imtina edib və hökm elan olunana qədər həbsdə saxlanılıb.

Hadisə 14 sentyabr 2025-ci ildə baş verib. Xoştariya seçki qərargahının qarşısında Kaxa Kaladzenin təsvir olunduğu banner üzərinə “Rus Arzusu” sözlərini yazaraq bu addımını sosial şəbəkələrdə paylaşıb və həmrəylik nümayiş etdirdiyini bildirib.

Müxalif siyasətçi sosial şəbəkədə yaydığı açıqlamada həbsdə özünü yaxşı hiss etdiyini bildirib və tərəfdarlarını mübarizəni davam etdirməyə çağırıb. O, həmçinin hakimiyyəti “Rusiya rejimi” adlandıraraq bu mübarizənin doğura biləcəyi çətinliklərə hazır olduğunu qeyd edib.