Macarıstanın baş naziri Viktor Orban ölkəsi üzərindən Ukraynaya təbii qaz tədarükünün dayandırılacağını bildirib.

Orban bu qərarı Ukrayna ərazisi üzərindən Macarıstana Rusiya neftinin nəqlinin dayanması ilə əsaslandırıb. Onun sözlərinə görə, neftin nəqli bərpa olunana qədər Ukraynaya qaz verilməyəcək.

Məlumata görə, Ukrayna qaz tələbatının böyük hissəsini Macarıstandan idxal edir və ötən il bu göstərici ölkənin ümumi qaz idxalının təxminən 45 faizini təşkil edib.

Macarıstan Ukraynanı “Dostluq” boru kəmərini zədələyərək Rusiyadan neft nəqlini qəsdən dayandırmaqda ittiham edir. Kiyev isə kəmərin yanvar ayında Rusiyanın dron hücumu nəticəsində zədələndiyini və mümkün qədər tez bərpa olunması üçün işlərin aparıldığını bildirir. Ukrayna prezidenti Volodimir Zelenski boru kəmərinin təxminən bir ay yarım ərzində işlək vəziyyətə gətirilə biləcəyini qeyd edib.

Orban daha əvvəl Ukraynadan mümkün hücum təhlükəsi ilə bağlı ölkəsinin əsas enerji infrastrukturlarında əlavə təhlükəsizlik tədbirlərinin görülməsi barədə göstəriş verib. O, həmçinin Ukrayna hökumətinin Macarıstana təzyiq göstərmək üçün “neft blokadası”ndan istifadə etdiyini iddia edib.

Qeyd edək ki, Rusiyanın 2022-ci ildə Ukraynaya qarşı müharibəsindən sonra bir çox Avropa ölkəsi Rusiya enerjisindən imtina etsə də, Macarıstan və Slovakiya Rusiya nefti və qazının idxalını davam etdirir. Orban hökuməti Ukraynaya ayrılan Avropa İttifaqı yardım paketlərinə və Rusiyaya qarşı yeni sanksiyalara da etiraz edir.