Avropa İttifaqının Hərbi Dəniz Missiyası EUNAVFOR Aspides Qırmızı dəniz və Ədən körfəzinin şərqində husilərin beynəlxalq dəniz nəqliyyatına qarşı hücum təhlükəsinin artdığını açıqlayıb.

Missiya bölgədə hərəkət edən gəmilərin yenidən hədəfə çevrilə biləcəyini bildirərək dəniz daşımaları ilə məşğul olan şirkətlərə xüsusi ehtiyat tədbirləri görməyi tövsiyə edib.

Qeyd olunur ki, Husi hərəkatı İsrailə qarşı hücumlarını yenidən aktivləşdirib. Martın 28-i axşam yayılan məlumata görə, qruplaşma münaqişəyə qoşulduqdan sonra İsrailə ikinci hava zərbəsini endirdiyini bəyan edib. Qruplaşmanın sözçüsü Yəhya Sərii İsrail ərazisində bir neçə mühüm hərbi obyektin raket və pilotsuz uçuş aparatları ilə vurulduğunu bildirib.

Eyni zamanda, Hörmüz boğazının faktiki olaraq bağlı olduğu qeyd edilir. Aİ missiyası hesab edir ki, artıq Qırmızı dəniz və Ədən körfəzi üzərindən həyata keçirilən dəniz daşımaları ciddi risk altındadır. Bu səbəbdən İsrail və ABŞ-la əlaqəli gəmilərə həmin marşrutdan istifadə etməmək tövsiyə olunur.

Xatırladaq ki, husilər əvvəllər də Qırmızı dəniz və Ədən körfəzində ticarət gəmilərinə hücumlar həyata keçiriblər. Region Süveyş kanalı və Bab əl-Məndab boğazı vasitəsilə dünya ticarəti üçün strateji əhəmiyyət daşıyan əsas dəniz marşrutlarından biri hesab olunur.