Ukrayna Hərbi Hava Qüvvələri mayın 16-da səhər saatlarında F-16 qırıcı təyyarəsinin itirildiyini təsdiqləyib. Məlumata görə, təyyarə Rusiyanın hava hücumlarını – xüsusilə dron hücumlarını dəf etməyə çalışarkən “qeyri-adi vəziyyət”lə üzləşib və göyərtə ilə əlaqə itib.

Pilot katapult olunaraq xilas edilib və dərhal qəzaya düşən ərazidən təxliyə olunub. Rəsmi mənbələr onun vəziyyətinin stabil olduğunu və həyatı üçün təhlükə olmadığını bildirib.

Bu, ABŞ istehsalı F-16 qırıcılarının Ukrayna tərəfindən müharibə ərzində üçüncü itkisi kimi qeydə alınıb. İlk belə hal 2024-cü il avqustun 26-da baş vermişdi. Həmin vaxt qırıcı Rusiya hava hücumunu dəf edərkən qəzaya uğramış, nəticədə pilot həyatını itirmişdi. O dövrdə qəzanın səbəbləri sırasında “dost atəşi”, texniki nasazlıq və pilot xətası araşdırılırdı.

İkinci F-16 isə 2025-ci ilin aprelin 12-də döyüş tapşırığı yerinə yetirərkən qəzaya uğrayıb. Moskva təyyarənin Rusiya hava hücumundan müdafiə sistemləri tərəfindən vurulduğunu iddia etsə də, Kiyev bu məlumatı təsdiqləməyib.

Ukrayna 2024-cü ilin yayında ilk F-16-larını Qərb müttəfiqlərindən alıb. Ölkəyə bu tipdə neçə qırıcı təyyarənin ötürüldüyü isə hələ də rəsmi olaraq açıqlanmır.