Rusiyanın Tambov və Moskva vilayətlərində “Wildberries” şirkətinə məxsus iki logistika mərkəzinin dron hücumlarına məruz qaldığı bildirilir.

Tambov vilayətinin qubernatoru Yevgeni Pervışovun sözlərinə görə, Kotovsk şəhərində yerləşən logistika mərkəzinə gecə saatlarında edilən hücum nəticəsində 7 anbar işçisi həlak olub, daha 25 nəfər yaralanıb.

Hadisə zamanı ölən və yaralanan şəxslərin gecə növbəsində işlədikləri bildirilir. Yaralılar Kotovsk və Tambov şəhərlərindəki xəstəxanalara yerləşdirilib.

Hücumdan sonra anbarda yanğın baş verib. Qubernator yanğının söndürüldüyünü, ərazidə fövqəladə xidmətlərin işlərini davam etdirdiyini bildirib.

Gecə saatlarında Moskvadan təxminən 50 kilometr şərqdə yerləşən Elektrostal şəhərindəki digər “Wildberries” logistika mərkəzinin də dron hücumuna məruz qaldığı açıqlanıb. Şirkətin məlumatına görə, əməkdaşlar təxliyə edilib, yanğınsöndürənlər və təcili yardım xidmətləri hadisə yerinə cəlb olunub.

Moskva meri Sergey Sobyanin isə cümə günü saat 20:30-dan etibarən Rusiya paytaxtı istiqamətində 370-dən çox pilotsuz uçuş aparatının hərəkət etdiyini bildirib. Onun sözlərinə görə, dronların əksəriyyəti hava hücumundan müdafiə sistemləri tərəfindən uzaq məsafədən zərərsizləşdirilib, 64 PUA isə Moskvaya yaxınlaşarkən məhv edilib.

Qonşu Vladimir vilayətində də dron hücumu qeydə alınıb. Qubernator Aleksandr Avdeyevin sözlərinə görə, pilotsuz uçuş aparatı Vladimir şəhərində yaşayış binasındakı mənzillərdən birinə çırpılıb və yanğına səbəb olub.