Azərbaycan Prezidenti İlham Əliyev iyulun 10-da bir sıra beynəlxalq maliyyə və təhlükəsizlik qurumlarının rəhbər şəxsləri ilə görüşüb.

Qəbulda Maliyyə Tədbirləri üzrə İşçi Qrupunun və MONEYVAL-ın prezidenti, Böyük Britaniya Maliyyə Nazirliyinin İqtisadi Cinayətkarlıq və Sanksiyalar üzrə direktoru Giles Tompson, Türk Dövlətləri Təşkilatının Baş katibi Kubanıçbek Ömüralıyev, eləcə də Eqmont Qrupunun rəhbər vəzifəli şəxsləri iştirak ediblər.

Nümayəndə heyətinə Polşa, Fransa, San Marino, Almaniya və Səudiyyə Ərəbistanının maliyyə kəşfiyyatı qurumlarının təmsilçiləri də daxil olub.

Görüş zamanı Azərbaycanın Eqmont Qrupunun illik plenar sessiyasına ev sahibliyi etdiyi vurğulanıb. Tədbirin yüksək səviyyədə təşkil olunduğu və sessiya çərçivəsində səmərəli müzakirələrin aparıldığı bildirilib.

Tərəflər Azərbaycanla nümayəndə heyətində təmsil olunan qurumlar arasında mövcud əməkdaşlığı müsbət qiymətləndirib, tərəfdaşlığın daha da genişləndirilməsi imkanlarını müzakirə ediblər.

Görüşdə Azərbaycanda çirkli pulların yuyulması və terrorçuluğun maliyyələşdirilməsinə qarşı mübarizə sahəsində görülən tədbirlərdən də danışılıb. Bu istiqamətdə ardıcıl işlərin aparıldığı və mühüm nəticələrin əldə olunduğu qeyd edilib.