Almaniya kansleri Fridrix Mertsin rəhbərlik etdiyi hakim koalisiya ölkə iqtisadiyyatını canlandırmaq məqsədilə genişmiqyaslı islahat paketi təqdim edib. Paketə aşağı gəlirli vətəndaşlar üçün illik 10 milyard avroluq vergi güzəştləri, pensiya sistemində dəyişikliklər, bürokratiyanın azaldılması və əlçatan mənzil tikintisinin artırılması daxildir.

Merts bildirib ki, hökumətin məqsədi Almaniyanı yenidən “doğru yola qaytarmaq”, şirkətlərə daha çox çeviklik vermək, sosial dövləti qorumaq və həm işçilərin, həm də biznesin yükünü azaltmaqdır.

İslahatların əsas hissəsi 2027-ci il yanvarın 1-dən qüvvəyə minməsi planlaşdırılan gəlir vergisi dəyişiklikləridir. Bu dəyişikliklər çərçivəsində vergidən azad minimum məbləğin və uşaq güzəştlərinin artırılması, uşaq pulunun yüksəldilməsi, eləcə də muzdlu işçilər üçün standart vergi çıxımının genişləndirilməsi nəzərdə tutulur. Hökumətin hesablamalarına görə, iki uşaqlı ailə 2028-ci ildən etibarən ildə 600 avrodan çox qənaət edə biləcək.

Bu güzəştlərin maliyyələşdirilməsi üçün yüksək gəlirli şəxslərə tətbiq olunan vergi yükü artırılacaq. İllik gəliri 250 min avrodan çox olanlar üçün vergi dərəcəsi 45 faiz, 280 min avrodan yuxarı gəlirlər üçün isə 47 faiz olacaq. Sosial Demokrat Partiyasının sədri Lars Klingbayl bildirib ki, ölkədə ən yüksək qazancı olan şəxslərin daha böyük pay götürməsi ədalətli yanaşmadır.

Paketə əmək bazarı və sosial sistemlə bağlı dəyişikliklər də daxildir. Səbəb göstərilmədən müddətli əmək müqavilələrinin bağlanması imkanı 48 aya qədər artırılacaq. Telefon vasitəsilə xəstəlik vərəqəsinin alınması isə tamamilə ləğv ediləcək.

Mənzil tikintisini stimullaşdırmaq üçün dövlətə məxsus mənzil tikintisi şirkətinin yaradılması planlaşdırılır. Xristian Sosial İttifaqının sədri Markus Zöder bildirib ki, federal qanun eyni zamanda torpaqlar səviyyəsində özəl mənzil fondunun milliləşdirilməsinin qarşısını alacaq.

İslahat paketi bürokratiyanın azaldılmasını da hədəfləyir. Rəqəmsallaşma vasitəsilə federal nazirliklərdə ştatların 8 faiz azaldılması, sosial yardım sahəsində sui-istifadə hallarına qarşı fəaliyyət planının hazırlanması və icazə prosedurlarının sürətləndirilməsi nəzərdə tutulur.

Koalisiya tərəfdaşları hökumətin artıq problemləri sadalamaqdan real addımlar mərhələsinə keçdiyini bildiriblər. Klingbaylın sözlərinə görə, əsas diqqət Almaniya iqtisadiyyatının yenidən böyüməsinə yönəlib. Zöder isə paketi “durğunluq yox, hərəkət” kimi qiymətləndirib.

Reuters agentliyi yazır ki, Merts hazırda ictimai rəy sorğularında ifrat sağçı “Almaniya üçün Alternativ” partiyasından geri qalır və Avropanın ən böyük iqtisadiyyatını canlandırmaq üçün ciddi təzyiq altındadır.

Deutsche Bank Research-in nümayəndəsi Marion Mülberger paketi son onilliklərin ən mühüm islahat proqramlarından biri adlandırıb. Onun fikrincə, hökumət əsas struktur islahatları üzrə razılığa gəlmək və onları ilin sonunadək həyata keçirmək qabiliyyətini nümayiş etdirib.

Almaniya iqtisadiyyatı pandemiyadan sonra əvvəlki inkişaf tempini bərpa etməkdə çətinlik çəkir. Çinlə artan rəqabət, Ukraynadakı müharibə fonunda enerji qiymətlərinin yüksəlməsi və İran ətrafında gərginliyin artması ölkə iqtisadiyyatına əlavə təzyiq yaradır.

Apreldə Almaniya hökuməti 2026-cı il üçün iqtisadi artım proqnozunu iki dəfə azaldaraq 0,5 faizə endirib. 2027-ci il üçün proqnoz isə əvvəlki 1,3 faizdən 0,9 faizə salınıb. Enerji qiymətlərinin artması fonunda inflyasiya proqnozları da yüksəldilib.