Rusiya ordusu iyulun 5-nə keçən gecə Ukraynaya növbəti kütləvi hava hücumu həyata keçirib.

Məlumata görə, hücum zamanı Rusiya qüvvələri bir ədəd X-31 tipli antiradar raketindən, üç ədəd X-59/69 idarəolunan aviasiya raketindən və 125 pilotsuz uçuş aparatından istifadə edib. Hücumda “Shahed”, “Gerbera”, “İtalmas” tipli dronlar, eləcə də imitasiya məqsədli “Parodiya” PUA-ları yer alıb.

Ukrayna Hərbi Hava Qüvvələrinin məlumatına əsasən, hava hücumundan müdafiə bölmələri gecə ərzində 112 pilotsuz uçuş aparatını və üç raketi vurub və ya radioelektron mübarizə vasitələri ilə zərərsizləşdirib. X-31 raketinin isə hədəfə çatmadığı bildirilib.

Hücum nəticəsində dörd pilotsuz aparatın üç müxtəlif əraziyə düşməsi qeydə alınıb. Bundan başqa, səkkiz məntəqədə vurulan hava hədəflərinin qalıqları aşkarlanıb.

Rusiya ordusunun hücumları nəticəsində Zaporojye və Dnepr şəhərlərində mülki şəxslərin yaralandığı bildirilir. Zaporojyedə çoxmərtəbəli yaşayış binasına ziyan dəyib, üç nəfər, o cümlədən bir uşaq xəsarət alıb. Dneprdə isə müəssisələrdən biri hədəfə alınıb, iki nəfər yaralanıb.

Ukrayna rəhbərliyi son hücumlar fonunda hava hücumundan müdafiə sistemlərinin gücləndirilməsini vacib sayır. Prezident Volodimir Zelenski Almaniya Kansleri Fridrix Merts ilə danışığında “Patriot” sistemləri üçün raket tədarükünün əsas prioritetlərdən biri olduğunu bildirib.