Milli Məclisin deputatı Fazil Mustafaya qarşı 2023-cü ildə törədilən sui-qəsd cəhdi işi üzrə daha bir təqsirləndirilən şəxs barəsində məhkəmə hökmü çıxarılıb.

Noyabrın 13-də Bakı Ağır Cinayətlər Məhkəməsində hakim Səbinə Məmmədzadənin sədrliyi ilə keçirilən prosesdə Əbülfəz Səricanova hökm oxunub. O, Cinayət Məcəlləsinin 28.277-ci maddəsi (dövlət və ictimai xadimin həyatına sui-qəsd etməyə hazırlıq) üzrə 10 il azadlıqdan məhrumetmə cəzası alıb.

Məlumatı onun yaxınları təsdiqləyib. Əbülfəz Səricanov ittihamla razılaşmadığını bildirib.

Sui-qəsd necə baş vermişdi?

Deputat Fazil Mustafa 2023-cü il martın 28-də Zabrat qəsəbəsində yaşadığı evin qarşısında silahlı hücuma məruz qalmışdı. O, çiyin və bud nahiyəsindən güllə yarası almış və xəstəxanaya çatdırılmışdı.

Hadisədən sonra ümumilikdə beş nəfər saxlanılmışdı. İttiham aktına görə:
• Sui-qəsd planının İrandan sifariş olunduğu,
• İcraçılara bunun qarşılığında 30 min ABŞ dolları göndərildiyi iddia olunur.

İş üzrə əvvəlki hökmlər

Cinayətin təşkilində təqsirləndirilən, Əbülfəz Səricanovun atası Azər Səricanov ömürlük həbs cəzası alıb.
Digər dörd nəfərdən biri 4 il, qalan üçü isə 18–20 il azadlıqdan məhrum edilib.

Təqsirləndirilən şəxslər hökmün qanunsuz olduğunu deyərək yuxarı instansiyalara şikayət etsələr də, qərar dəyişməyib.

Onlar Fazil Mustafaya atəş açdıqlarını qəbul etsələr də, İrandan sifariş almadıqlarını və onu öldürmək niyyətlərinin olmadığını bildirirlər.

İş üzrə məhkəmə araşdırmaları davam edir.