Rusiya vətəndaşı olan talış fəal Kamal İsayevin İstanbulda saxlanılaraq Azərbaycana gətirildiyi iddia olunur. Bu barədə “Toplum TV”-yə fəalın həyat yoldaşı Aida İsayevə məlumat verib.

Moskvada yaşayan A.İsayevanın sözlərinə görə, həyat yoldaşının tutulduğunu noyabrın 12-də Bakıda yaşayan baldızından öyrənib. O bildirib ki, Kamal İsayevlə noyabrın 7-dən etibarən əlaqə saxlamaq mümkün olmayıb.

Aida İsayevə qeyd edib ki, hələ də həyat yoldaşı ilə danışa bilmir və baldızı da məlumatı dövlət hesabına təyin olunan vəkildən alıb:

“Vəkil deyir ki, guya Kamal həbsin ictimailəşməsini istəmir. Mən isə bunun yalan olduğunu bilirəm. Eyni hal İqbal Əbilovun da başına gəldi.”

O bildirib ki, həyat yoldaşı Sovet İttifaqı dağılmazdan əvvəl Moskvaya köçüb və sonradan Rusiya vətəndaşlığı alıb. A.İsayeva “Facebook” hesabında Rusiya prezidenti Vladimir Putinə müraciət edərək ərinin azad olunmasına kömək göstərilməsini xahiş edib.

A.İsayevanın sözlərinə görə, xroniki peptik yara xəstəliyindən əziyyət çəkən Kamal İsayev noyabrın 2-də müalicə məqsədilə İstanbula gedib:

“7 noyabr gecəsi ‘WhatsApp’ vasitəsilə mesaj göndərdi və bildirdi ki, 8 noyabr gecə reysi ilə evə qayıdacaq.”

A.İsayevanın iddiasına görə, noyabrın 12-də vəkil onun baldızına zəng edərək Kamal İsayevin İstanbulda saxlanılıb Bakıya gətirildiyini və hazırda təcridxanada olduğunu deyib.

Vəkil Cahangir Cavadov “OC Media”ya bildirib ki, Kamal İsayev onu vəkil kimi rədd edib və buna görə irəli sürülmüş ittihamlar barədə məlumat verə bilməz. Bununla belə, o iddia edir ki, İsayevin ikili vətəndaşlığı var və bu səbəbdən beynəlxalq qanunvericilik onun Azərbaycana deportasiyasını qadağan etmir.

Aida İsayevə isə bildirir ki, həyat yoldaşı heç vaxt Azərbaycan vətəndaşlığı daşımayıb.

Kamal İsayev mediada fəallığı ilə tanınır — onun “YouTube”da “Jahid Kamal” və “Arya Toloş” adlı kanalları olub və o, Azərbaycan hakimiyyətinin etnik azlıqlarla bağlı siyasətini mütəmadi tənqid edib:

“O, talışların hüquqlarından, talış dilinin ölməsindən danışırdı. Həmçinin siyasi məhbusları müdafiə edirdi. Heç vaxt dövlət çevrilişindən danışmayıb”, — A.İsayevə deyib.

Oxşar hallar

Mart ayında talış tarixçi Zahirəddin İbrahimovun Rusiyanın Yekaterinburq şəhərində yoxa çıxması və daha sonra DTX tərəfindən saxlanılması barədə məlumat yayılmışdı. Ona qarşı dövlətə xəyanət də daxil olmaqla bir neçə maddə üzrə ittiham irəli sürüldüyü bildirilir.

Belarusda yaşayan talış mədəniyyəti tədqiqatçısı İqbal Əbilov isə 2024-cü il iyulun 22-də Azərbaycana səfəri zamanı saxlanılmış və Lənkəran Ağır Cinayətlər Məhkəməsi tərəfindən 18 il həbs cəzası alıb. Ona Cinayət Məcəlləsinin 274-cü, 281.3-cü və 283.1-ci maddələri ilə ittiham irəli sürülüb. Beynəlxalq təşkilatlar və BMT məruzəçiləri İqbal Əbilovu “siyasi məhbus” kimi tanıyıblar.