Azərbaycan Qida Təhlükəsizliyi Agentliyi (AQTA) Qurban bayramı ilə əlaqədar heyvanların satışı və kəsimi üçün yaradılmış şərait barədə məlumat yayıb. Bildirilib ki, Naxçıvan da daxil olmaqla, ölkə üzrə ümumilikdə 135 ünvanda qurbanlıq heyvanların satışı və kəsimi xidmətləri təşkil olunub.

Bu ünvanlardan:
• 77-də həm heyvanların satışı, həm də kəsimi,
• 30-da yalnız satış,
• 28-də isə yalnız kəsim xidmətləri göstərilir.

Bundan əlavə, bayram günlərində bir sıra regionlarda səyyar heyvan kəsimi çadırları da qurulub. Bu çadırlar Zəngilan rayonunun Ağalı kəndi, Ağdərə rayonunun Talış kəndi, eləcə də Ağdam, Şuşa, Füzuli və Cəbrayıl rayonlarını əhatə edir. Kəsimlər burada da baytarlıq nəzarəti altında həyata keçirilir.

Kəsim məntəqələrində Qida Təhlükəsizliyi İnstitutunun baytarlıq laboratoriyaları fəaliyyət göstərir. Gücləndirilmiş rejimdə çalışan bu laboratoriyalarda peşəkar baytar həkimlər heyvanların sağlamlığını yoxlayır. Hər hansı xəstəliyə şübhə yaranarsa, nümunələr götürülərək Mərkəzi Baytarlıq Laboratoriyasında əlavə müayinələr aparılır.

Eyni zamanda, ölkə ərazisində fəaliyyət göstərən soyuducu infrastruktura malik ticarət şəbəkələri tərəfindən də əvvəlcədən qəbul olunmuş sifarişlər əsasında heyvanların kəsimi və ətinin vətəndaşlara çatdırılması xidməti göstərilir.

Qurban bayramı günlərində əhalinin təhlükəsiz və sağlam ət məhsuluna çıxışının təmin olunması məqsədilə AQTA nəzarət tədbirlərini gücləndirilmiş şəkildə davam etdirir.