6-7 iyun tarixlərində ölkəmizdə Qurban bayramı qeyd olunacaq. Bayram günlərində qurbanlıq heyvanların kəsimi ilə bağlı bir sıra vacib qaydalara riayət olunması tələb olunur. Azərbaycan Qida Təhlükəsizliyi Agentliyinin (AQTA) İnformasiya təminatı və innovativ həllər şöbəsinin verdiyi məlumata görə, kəsim prosesi yalnız xüsusi ayrılmış, sanitariya-gigiyena tələblərinə cavab verən məntəqələrdə aparılmalıdır.

Küçə, yol kənarı və məhəllə aralarında həyata keçirilən qanunsuz və antisanitar kəsimlər xəstəliklərin yayılmasına səbəb ola bilər. AQTA bildirir ki, heyvanların kəsimi yalnız insan sağlamlığının qorunması və ətraf mühitin çirklənməsinin qarşısının alınması məqsədi ilə yaradılmış infrastrukturla təmin olunmuş yerlərdə aparılmalıdır.

Kəsim məntəqələri fasiləsiz su təchizatı ilə təmin edilməli, qəssablar xüsusi geyimdə və tibbi müayinədən keçmiş olmalıdır. Alətlər mütəmadi olaraq dezinfeksiya olunmalı, yaranan tullantılar isə vaxtında və düzgün şəkildə ərazidən kənarlaşdırılmalıdır.

Ət məhsullarının satışı həyata keçirilən məkanlar sanitar və baytarlıq tələblərinə cavab verməli, cəmdəklər soyuducu avadanlıqlarda saxlanılmalı və soyuq zəncir prinsipi qorunmalıdır. Diri heyvanların bu nöqtələrdə satışına icazə verilmir.

Agentlik xəbərdarlıq edir ki, tələb olunan infrastruktur və nəzarət sistemi olmadan həyata keçirilən kəsim və satışlar həm sağlamlıq üçün təhlükəli, həm də qanunsuzdur. Qurbanlıq heyvan alarkən və kəsim zamanı vətəndaşlardan rəsmi nəzarətdə olan məntəqələrə müraciət etmələri tövsiyə olunur.