"Bu gün Qubad İbadoğlunun əleyhinə saxta ifadələr verən Fazil Qasımov barədə post paylaşdım, sonuncunun psixi və fiziki zorakılıqlar altında saxta protokol və qərarları imzaladığını bidirdim.

Fazil Qasımovun qardaşı Nizami Qasımovun mənə zəng edib söylədiklərinə əsaslandım. O Nizami Qasımov ki, qardaşı Fazil Qasımov Türkiyədən oğurlanıb Bakıya gətirildikdən, Qubad bəyin əleyhinə qurama ifadələr verdikdən sonra ona zəng etdim, bunları dedim: “Sizin qardaşınızdan pis şəkildə istifadə edib, sonra da aldadacaqlar. Gəlin bir yerdə işləyək. Əlimdən gələn köməyi əsirgəməyəcəm. Qardaşınıza izah edin ki, uydurma ittihamlar irəli sürən istintaqla əməkdaşlığı dayandırsın. İctimaiyyətin, medianın qarşısına çıxaq, bərabər şəkildə imkanlarımızı səfərbər edək.”

Həmin zaman (elə indi də) Whatsapp-da İlham Əliyevlə Rəcəb Tayyib Ərdoğanın bərabər fotolarını paylaşan Nizami Qasımovun reaksiyası belə oldu: “Mən və qardaşım dövlətimizə inanırıq. Köməyinizə ehtiyacımız yoxdur.”

İş elə gətirdi ki, inandıqları dövlətin siyasi və hüquqi simaları Fazil Qasımovdan istədikləri şəkildə istifadə etdilər, beynəlxalq təzyiqlərin nəticəsində Qubad İbadoğlunu ev dustaqlığına buraxıb, üzəduranları həbsdə saxladılar.

İbrətamiz hekayədir, deyilmi?

Əlbəttə, bundan sonra Fazil Qasımovun hüquqlarının qayğısına qalıramsa, insanlarda bəlkə də haqlı suallar yaranır. Təsadüfi deyil ki, bu gün bəzi sosial şəbəkə istifadəçiləri, eləcə də yaxın dost hesab etdiyim şəxslər səmimi olaraq məni qınadılar, üzəduran, şərbaz birisinin reablitasiyasına çalışdığımı dedilər, düzgün sayılmayan işlə məşğul olduğumu söyləyib tənqid etdilər.

Təbii, mənə irad tutan şəxslərin mövqe və hisslərini anlayıram, Qubad İbadoğlunun şərlənməsində rol almış adamın hüquqlarını müdafiə etməyin çətinliyini dərk edirəm.
Bununla belə, hazırkı vəziyyətdə hüququn diqtə etdiyi prinsiplər üzrə çalışmağa, işgəncə, qeyri-insani rəftar, ləyaqəti alçaldan davranış barədə daxil olan məlumatlara etinasız qalmamağa üstünlük verirəm, peşəkar vərdişləri önə çəkirəm, çünki mən sevdiyim işə-hüquq müdafiəçiliyinə iddia edirəm.
Bir qədər əvvəl Fazil Qasımovun Ombudsman Səbinə Əliyevaya, Baş prokuror Kamran Əliyevə, Türkiyə Böyük Millət Məclisinə ünvanladığı müraciətlərlə tanış oldum.
Fazil Qasımov həmin müraciətlərdə Baş Mütəşəkkil Cinayətkarlıqla Mübarizə İdarəsində (“Banditizm”) məruz qaldığı işgəncə formalarını sadalayır, Qubad İbadoğlunun əleyhinə verdiyi ifadələri psixi və fiziki zorakılıqlar altında imzaladığını dönə-dönə qeyd edir.

Həmin müraciətlərdən məlum olur ki, Fazil Qasımova işgəncələr verilərkən elektroşok cihazından da istifadə ediblər.
Qasımovun başını unitazın içinə soxublar.

O, müraciətində qeyd edir ki, “Banditizm”in 4-cü mərtəbəsinin ayaqyolunda başı bir müddət unitazın içində qalıb.
Sonra qollarını qandallayıb saatlarca döyüblər.

Fazil Qasımov onu da göstərir ki, vəkili Anar Qasımov müstəntiqlə əməkdaşlıq edib, sübutların saxtalaşdırılmasında rol oynayıb".

Rüfət Səfərov
Hüquq müdafiəcisi