İranın Ali lideri Əli Xamenei ABŞ-nin İrana qarşı mümkün hərbi addımlarına münasibət bildirərək, ölkə vətəndaşlarını qorxmamağa çağırıb.

“Tasnim” agentliyinin məlumatına görə, Xamenei bildirib ki, ABŞ-nin İrana qarşı yeni hərbi təcavüzü regional miqyaslı münaqişəyə çevriləcək. Onun sözlərinə görə, Vaşinqton belə bir addım atacağı təqdirdə nəticələr yalnız İranla məhdudlaşmayacaq.

“Amerikalılar bilməlidirlər ki, əgər onlar müharibəyə başlasalar, bu dəfə bu, regional səviyyəli bir müharibə olacaq”, – deyə Ali lider vurğulayıb.

Əli Xamenei həmçinin Prezident Donald Trampın ABŞ qoşunlarının Yaxın Şərqdə yerləşdirilməsi ilə bağlı təhdidlərinə toxunaraq, iranlıların bu bəyanatlardan çəkinməməli olduqlarını bildirib.

O əlavə edib ki, İran müharibə başlatmaq niyyətində deyil:
“Biz müharibələrə başlamırıq və heç bir ölkəyə hücum etmək istəmirik. Lakin İran xalqı hücum edən və zərər verən tərəfə sərt cavab verəcək”.

Xameneinin açıqlaması regionda ABŞ–İran gərginliyinin artdığı bir dövrdə səsləndirilib.