ABŞ-ın İrana mümkün hərbi zərbəsi ilə bağlı qeyri-müəyyənlik Azərbaycanda narahatlıq doğurur. Bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev BƏƏ-nin “The National” nəşrinə müsahibəsində bildirib.

Onun sözlərinə görə, mövcud vəziyyət son dərəcə proqnozlaşdırılmazdır:
“Vəziyyət proqnozlaşdırılmazdır və bununla əlaqədar yarana biləcək bütün təhdid və çağırışları düzgün qiymətləndirmək çətin olacaq”.

Hikmət Hacıyev vurğulayıb ki, Azərbaycan bu məsələni Vaşinqtonla müzakirə etməyib:
“Biz bu məsələni ABŞ-la müzakirə etmirik və onlar da bu mövzuda bizimlə heç vaxt əlaqə saxlamayıblar”.

Prezidentin köməkçisi qeyd edib ki, son günlərdə Azərbaycan rəsmiləri iranlı həmkarları ilə təmaslarda olublar. Bununla belə, o bildirib ki, İrandakı mövcud təhlükəsizlik vəziyyəti Azərbaycanın dərhal müdaxiləsini zəruri etmir:
“Rəsmi Bakı həmişə digər ölkələrin daxili işlərinə qarışmaqdan kənardır”.

Hikmət Hacıyev əlavə edib ki, Azərbaycan hazırda mürəkkəb geosiyasi mühitdə yerləşir və özünü İran və Rusiya arasında “iki dünya müharibəsi arasında” sıxılmış kimi hiss edir:
“Bir tərəfdə Rusiya–Ukrayna müharibəsi davam edir, digər tərəfdən isə İsrail–İran qarşıdurması və ABŞ-ın bu prosesdə iştirakı mövcuddur”.

O vurğulayıb ki, bütün bu amillər region üçün əlavə risklər yaradır və Azərbaycan vəziyyəti diqqətlə izləyir.