Azərbaycan Yerüstü Nəqliyyat Agentliyi (AYNA) paytaxt Bakı ilə yanaşı regionlarda da sərnişindaşıma xidmətinin keyfiyyətini artırmaq və idarəetmədə şəffaflığı təmin etmək məqsədilə bir sıra tender layihələrinə start verib.

Agentlik tərəfindən elan olunmuş tenderlərin ehtimal olunan ümumi dəyəri 3 693 073,57 AZN (üç milyon altı yüz doxsan üç min yetmiş üç manat, əlli yeddi qəpik) təşkil edir.

Layihələrin əsas hissəsi sərnişinlərin rahatlığının təmin olunmasına yönəlib. Bu çərçivədə Bakı şəhərində və müxtəlif regionlarda yerləşən küçə və prospektlərdə müasir standartlara cavab verən yeni avtobus dayanacaq pavilyonlarının quraşdırılması nəzərdə tutulur. Sözügedən genişmiqyaslı infrastruktur işləri üçün 3 654 073,57 AZN vəsait ayrılıb.

Bununla yanaşı, AYNA maliyyə fəaliyyətinin beynəlxalq standartlara uyğunluğunu yoxlamaq məqsədilə audit xidmətinin satın alınmasını da planlaşdırır. Maliyyə Hesabatlarının Beynəlxalq Standartlarına (MHBS) uyğun hazırlanmış hesabatların kənar auditinin aparılması üçün 39 000 AZN məbləğində büdcə müəyyən edilib.

Qeyd edək ki, həyata keçirilən bu layihələr ölkə üzrə sərnişindaşıma infrastrukturunun təkmilləşdirilməsinə və xidmət səviyyəsinin yüksəldilməsinə xidmət edir.