Dövlət İmtahan Mərkəzinin (DİM) İdarə Heyətinin sədri Məleykə Abbaszadə hazırda həbsdə olan təhsil eksperti Kamran Əsədovla bağlı suala cavab verərkən bildirib ki, paralel şəkildə iki proses aparılır və bu proseslərə cəlb olunan şəxslərin adlarının çəkilməsi məqsədəuyğun deyil.

Onun sözlərinə görə, həmin proseslərdə əsasən hazırlıq fəaliyyəti ilə məşğul olan şəxslər iştirak edir və bu şəxslər uzun müddət abituriyentlərlə ictimaiyyət arasında süni maneələr yaradaraq imtahanlarla bağlı şayiələr və əsassız iddialar yayıblar. Sədr qeyd edib ki, aparılan araşdırmalar bu fəaliyyətlərin arxasında fərqli məqsədlərin dayandığını üzə çıxarıb.

Məleykə Abbaszadə vurğulayıb ki, artıq kimlərin səmimi, kimlərin isə riyakar mövqe tutduğu cəmiyyət üçün aydındır və belə şəxslərin təhsil sistemindən uzaqlaşması arzuolunandır.

DİM sədri əlavə edib ki, imtahan prosesləri daim nəzarətdə saxlanılır və köçürmə halları təkcə imtahan zallarında deyil, nəticələrin emalı mərhələsində də xüsusi alqoritmlər vasitəsilə aşkar edilir. Onun sözlərinə görə, mövcud texnoloji imkanlar kimlərin kimdən köçürdüyünü dəqiq müəyyən etməyə imkan verir.

Qeyd edək ki, son qəbul imtahanlarında qanunsuz texniki vasitələrdən istifadə ittihamı ilə saxlanılan təhsil eksperti Kamran Əsədov barəsində həbs qətimkan tədbiri seçilib. Gəncə Şəhər Məhkəməsi prokurorun təqdimatını əsaslı hesab edərək, onun barəsində əvvəl seçilmiş “başqa yerə getməmək haqqında” qətimkan tədbirini həbs qətimkan tədbiri ilə əvəz edib və Kamran Əsədov məhkəmə zalında həbs olunub.