Bu gün görkəmli ictimai-siyasi xadim, Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin anadan olmasının 142-ci ildönümü qeyd olunur.

Məhəmməd Əmin Rəsulzadə 1884-cü il yanvarın 31-də Bakının Novxanı kəndində anadan olub. Gənc yaşlarından ictimai-siyasi fəaliyyətə qoşulan Rəsulzadə sosial-demokratlarla birgə “Hümmət” təşkilatının yaradılmasında iştirak edib. Çar hökumətinin təqibləri nəticəsində 1909-cu ildə İrana mühacirət edib, burada bir müddət “İrane-nou” qəzetinin baş redaktoru kimi fəaliyyət göstərib. Məşrutə inqilabının yatırılmasından sonra Türkiyəyə mühacirət edib.

1911-ci ildə Müsavat Partiyasına üzv qəbul olunan Məhəmməd Əmin Rəsulzadə 1915-ci ildə partiyanın Mərkəzi Komitəsinin sədri seçilib. 1918-ci ildə Fətəli xan Xoyski ilə birlikdə Şərqdə ilk demokratik respublika olan Azərbaycan Xalq Cümhuriyyətinin yaradıldığını rəsmi şəkildə elan edib.

1920-ci il aprelin 28-də Azərbaycan Xalq Cümhuriyyəti bolşeviklər tərəfindən işğal edildikdən sonra Rəsulzadə həbs olunub. Daha sonra Stalinin göstərişi ilə azadlığa buraxılaraq Moskvaya aparılıb. Sovet hakimiyyəti ilə əməkdaşlıqdan qəti şəkildə imtina edən Rəsulzadə SSRİ-ni tərk edərək mühacirət həyatını davam etdirib.

Məhəmməd Əmin Rəsulzadə 1955-ci il martın 6-da Ankarada vəfat edib.

Müstəqillik illərində onun irsinin yaşadılması istiqamətində bir sıra mühüm addımlar atılıb. 1992-ci il dekabrın 24-də Prezident Əbülfəz Elçibəy Rəsulzadənin repressiyaya məruz qalmış ailə üzvlərinin Azərbaycana qaytarılması ilə bağlı sərəncam imzalayıb. 1993-cü ildə Prezident Heydər Əliyevin sərəncamı ilə onun 110 illik yubileyi qeyd olunub. Prezident İlham Əliyev tərəfindən isə Rəsulzadənin 130 və 140 illik yubileyləri ilə bağlı müvafiq sərəncamlar imzalanıb, respublikada və xaricdə silsilə tədbirlər keçirilib.

Eyni zamanda, Azərbaycan Xalq Cümhuriyyətinin yaradılmasının 100-cü ildönümü münasibətilə 2018-ci il Prezident İlham Əliyevin sərəncamı ilə “Cümhuriyyət İli” elan edilib.

Məhəmməd Əmin Rəsulzadə Azərbaycan dövlətçilik tarixində müstəsna xidmətləri olan, milli istiqlal ideyasının əsas simalarından biri kimi xalqımızın yaddaşında əbədi yaşayır.