Fevralın 5-i səhər saatlarında Xaçmaz rayonunun Nərəcan kəndində dəmiryolu keçidində ağır yol-nəqliyyat hadisəsi baş verib. Məlumata görə, hərəkətdə olan qatar dəmiryolu keçidindən keçən “VAZ 2101” markalı minik avtomobili ilə toqquşub. Qəza nəticəsində avtomobilin sürücüsü — Xaçmaz rayonunun Ağtala kənd sakini, 22 yaşlı Səid Çələbiyev İlham oğlu hadisə yerində həyatını itirib. Faktla bağlı araşdırma aparılır.

Bundan əlavə, başqa bir ərazidə minik avtomobilinin sürücüsü dəmiryolu keçidindən keçid qaydalarını pozaraq hərəkətdə olan teplovozun qarşısına çıxıb. Bu barədə “Azərbaycan Dəmir Yolları” QSC-nin Mətbuat Xidməti məlumat verib. Bildirilib ki, maşinist tərəfindən təcili tormozlama aparılsa da, məsafənin az olması səbəbindən toqquşmanın qarşısını almaq mümkün olmayıb. Qəza nəticəsində minik avtomobilinin sürücüsü xəstəxanaya yerləşdirilib, dəmiryol infrastrukturuna isə zərər dəyib. Hadisə ilə bağlı araşdırma aparılır.

“Azərbaycan Dəmir Yolları” QSC nəqliyyat vasitələrinin sürücülərini “Yol hərəkəti haqqında” qanunun 44-cü maddəsinin tələblərinə ciddi riayət etməyə, dəmir yolu keçidlərinə yaxınlaşarkən sürəti azaltmağa, yüksək sayıqlıq göstərməyə və yalnız keçidin qatardan tam boş olduğuna əmin olduqdan sonra hərəkəti davam etdirməyə çağırır.

Qeyd edək ki, dəmiryolu keçidlərində təhlükəsizlik qaydalarına əməl olunmaması ağır və faciəvi nəticələrə səbəb ola bilər.