Sumqayıt şəhərində fəaliyyət göstərən “Qurtuluş” Reabilitasiya Mərkəzi MMC-də aşkar edilmiş ciddi qanun pozuntuları ilə bağlı cinayət işi başlanılıb. Vətəndaş müraciətləri əsasında Sumqayıt şəhər prokurorluğunda aparılan araşdırmalar nəticəsində mərkəzin rəhbərliyi və əməkdaşlarının qanunsuz əməlləri ilə bağlı əsaslı şübhələr müəyyən edilib.

Baş Prokurorluğun Mətbuat Xidmətinin məlumatına görə, ilkin dəlillər əsasında Azərbaycan Respublikası Cinayət Məcəlləsinin 125-ci (özünü öldürmə həddinə çatdırma), 145.2.1 və 145.2.4-cü (qabaqcadan əlbir olan bir qrup şəxs tərəfindən iki və ya daha çox şəxsə qarşı qanunsuz azadlıqdan məhrum etmə) maddələri ilə cinayət işi başlanaraq ibtidai istintaq aparılır.

İstintaqla müəyyən edilib ki, MMC-nin direktoru Ceyhun Salmanov Elşad Məhərrəmov, Natiq Əliyev və istintaqa məlum olmayan digər şəxslərlə qabaqcadan əlbir olaraq ayrı-ayrı vaxtlarda 7-dən çox şəxsi zor tətbiq etmə və aldatma yolu ilə mərkəzin Sumqayıt şəhəri, Corat qəsəbəsində yerləşən müəssisəsinə gətirib. Həmin şəxslər iradələrinə zidd olaraq qanunsuz saxlanılıb, yaxınları ilə əlaqə yaratmaq imkanından, o cümlədən mobil telefon və digər rabitə vasitələrindən məhrum edilib, onlara fiziki və psixoloji təzyiqlər göstərilib, bəzi hallarda sağlamlıqlarına xəsarət yetirilib.

Toplanmış sübutlar əsasında Ceyhun Salmanov, Elşad Məhərrəmov və Natiq Əliyev Cinayət Məcəlləsinin 127.1 (qəsdən sağlamlığa az ağır zərər vurma), 133.2.1 və 133.2.3 (qabaqcadan əlbir olan bir qrup şəxs tərəfindən iki və daha çox şəxsə, o cümlədən oğurlanmış şəxsə əzab vermə), 144.3 (ağır nəticələrə səbəb olan adam oğurluğu), 145.2.1 və 145.2.4-cü maddələri ilə təqsirləndirilən şəxs qismində cəlb olunublar.

Sumqayıt şəhər Məhkəməsinin qərarı ilə onların barəsində 2 ay 10 gün müddətinə həbs qətimkan tədbiri seçilib. Qanunsuz əməllərdə iştirak etmiş digər şəxslərin müəyyən edilməsi istiqamətində istintaq və əməliyyat-axtarış tədbirləri davam etdirilir.

Qeyd edək ki, “Qurtuluş” Reabilitasiya Mərkəzinin adı son vaxtlar mediada müxtəlif iddialarla hallansa da, başlanmış cinayət işinin Əməkdar jurnalist Nəsimi Nəbizadə ilə bağlı əvvəl səslənən məsələlərlə əlaqəsinin olmadığı bildirilib. Şikayətlər prokurorluğa ötən ilin dekabr ayında daxil olub.