İsrail ilə İran arasında artan hərbi qarşıdurma Hindistanı ciddi şəkildə narahat edir. Rəsmi Dehli müharibə ilə bağlı neytral mövqe sərgiləsə də, bölgədəki gərginlik Hindistanın enerji, logistika və regional nəqliyyat layihələrinə zərbə vurur.

Hindistan üçün əsas narahatlıq səbəblərindən biri ölkənin İrandan neft idxalı ilə bağlıdır. Müharibə nəticəsində regionda sabitliyin pozulması, enerji tədarükünün kəsilməsi riski yaradır. Bu isə Hindistan iqtisadiyyatı üçün strateji təhlükə hesab olunur.

İkinci mühüm məqam isə Hindistanın İranın Çabahar limanına yatırdığı investisiyalardır. Dehli bu limanın yenidən qurulmasına 24 milyon dollar sərmayə qoyub. Ümumilikdə 370 milyon dollarlıq layihənin icrası hal-hazırda təhlükə altındadır. Müharibənin davamı Hindistanın limandan istifadə imkanlarını məhdudlaşdıracaq.

Üçüncü və daha geniş miqyaslı narahatlıq isə Hindistanın ümid bəslədiyi Şimal–Cənub nəqliyyat dəhlizi ilə bağlıdır. İran üzərindən keçən bu dəhliz Avrasiya regionunda Hindistanın əsas tranzit layihələrindən biridir. Münaqişənin uzanması bu dəhliz üzrə yükdaşımaları mümkünsüz hala gətirə bilər.

Bütün bu geosiyasi risklərə baxmayaraq, Hindistan rəsmi olaraq nə İsrailin hərəkətlərini qınayıb, nə də İranı dəstəkləyib. Dehli Şanxay Əməkdaşlıq Təşkilatının (ŞƏT) İsrailin hücumlarını pisləyən bəyanatına imza atmayıb. Halbuki bəyanatda İsrailin hücumları İranın suverenliyinə zidd və mülki obyektlərin dağıdılması kimi qiymətləndirilib.

Hindistan Xarici İşlər Nazirliyi isə daha neytral mövqe sərgiləyərək tərəfləri danışıqlara və diplomatik kanallardan istifadə etməyə çağırıb. Analitiklərə görə, Hindistanın belə bir mövqe tutmasının əsas səbəbi İsraillə mövcud olan hərbi-texniki əməkdaşlıqdır. İsrail son illərdə Hindistanın silahlanma proqramında mühüm tərəfdaş olmaqla yanaşı, Hindistan–Pakistan toqquşmasında da Dehlinin mövqeyini dəstəkləmişdi.

Müşahidəçilər hesab edirlər ki, İsrail–İran müharibəsi fonunda Hindistanın İranla bağlı bütün iqtisadi və nəqliyyat layihələri – o cümlədən Çabahar limanının idarə olunması və Şimal–Cənub dəhlizinin istismarı – müəyyən müddətə dayandırıla və ya təxirə salına bilər.