USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Avropa Parlamentində Azərbaycanla bağlı dinləmələr keçirilib
Mayın 7-də Avropa Parlamentinin İnsan Hüquqları üzrə Alt Komitəsində Azərbaycanla bağlı dinləmələr keçirilib.
Dinləmələrdə jurnalist Leyla Mustafayeva və hüquqşünas Səməd Rəhimli çıxış ediblər. Tədbir ötən ilin dekabrında sülh fəalı Bəhruz Səmədov və etnik araşdırmaçı İqbal Əbilovla bağlı qəbul olunmuş qətnamədən dörd ay sonraya təsadüf edib.
Berlində fəaliyyət göstərən “Qazetci” media qurumunun baş redaktoru və “Free Voices Collective” təmsilçisi Leyla Mustafayeva bildirib ki, 2023-cü ilin sonundan etibarən Azərbaycanda vətəndaş cəmiyyətinə qarşı repressiyalar güclənib və siyasi məhbusların sayı təxminən 400-ə çatıb.
O qeyd edib ki, Avropa tərəfindən məhkəmə islahatları üçün ayrılan maliyyə dəstəyinə baxmayaraq, həbsxanalarda işgəncə, pis rəftar və tibbi yardımın göstərilməməsi halları davam edir. Çıxış zamanı bir sıra həbsdə olan jurnalistlərin və fəalların adları çəkilib, onların sağlamlıq durumları ilə bağlı narahatlıq ifadə olunub.
Leyla Mustafayeva bildirib ki, Avropa İttifaqı və üzv dövlətlər bütün siyasi məhbusların azad edilməsini Bakı ilə gələcək əməkdaşlıq üçün əsas şərtlərdən biri kimi irəli sürməlidirlər. O, həmçinin insan hüquqları pozuntularında adı hallanan vəzifəli şəxslərə qarşı hədəfli sanksiyaların nəzərdən keçirilməsinə çağırıb.
Dinləmələrdə Azərbaycanın Avronest Parlament Assambleyası və Avropa Parlamenti ilə münasibətləri də müzakirə olunub.
Xatırladaq ki, mayın 1-də Milli Məclis Avropa Parlamenti ilə bütün istiqamətlər üzrə əməkdaşlığın dayandırılması barədə qərar qəbul edib. Qərardan sonra İlham Əliyev də İrəvanda keçirilən “Avropa Siyasi Birliyi” Zirvə toplantısında çıxışı zamanı Avropa Parlamentini tənqid edib.
Avropa Parlamentinin prezidenti Roberta Metsola isə cavabında bildirib ki, qurum demokratik prinsiplərlə fəaliyyət göstərir və qəbul olunan qətnamələr deputatların səs çoxluğu əsasında formalaşır.
