İsrailin son hərbi əməliyyatları nəticəsində İran ordusunun iki yüksək rütbəli generalı – Qulam Rza Mehrabi və Mehdi Rabani həlak olub. Bu barədə yerli və beynəlxalq media orqanları məlumat yayıb.

Hər iki şəxs İran Silahlı Qüvvələrinin Baş Qərargahında rəhbər vəzifələrdə çalışıb. General Qulam Rza Mehrabi ölkənin hava hücumundan müdafiə sistemi üzrə mütəxəssis, Mehdi Rabani isə hərbi-logistika sahəsində tanınmış fiqur kimi tanınırdı.

Hadisənin detalları hələlik rəsmi olaraq İran tərəfindən təsdiqlənməyib, lakin ölkə daxilində təhlükəsizlik tədbirləri gücləndirilib və paytaxt Tehranda hava hücumundan müdafiə sistemləri fəal şəkildə işə salınıb.

İsrail əməliyyatları davam etdirir

İsrail Baş naziri Benyamin Netanyahu bu günlərdə verdiyi bəyanatda İranın hərbi və nüvə infrastrukturunun hədəfə alındığını açıqlamışdı. O bildirmişdi ki, əməliyyatların məqsədi İran rejiminin “təhlükəli planlarını ifşa edib məhv etməkdir”.

Bölgədəki gərginlik artmaqda davam edir. Hücumların fonunda beynəlxalq təşkilatlar tərəfləri təmkinə və diplomatik kanallara qayıtmağa çağırır.