Pakistanın baş nazirinin müavini və xarici işlər naziri Məhəmməd İshaq Dar Hindistanın üç hava limanına hücum etməsi fonunda “Geo TV”yə açıqlama verib. O bildirib ki, ABŞ, Çin və digər beynəlxalq tərəfdaşlar Hindistan və Pakistan arasında gərginliyin azaldılması üçün tərəfləri təmkinə çağırıblar.

İshaq Dar ümid etdiyini bildirib ki, bu beynəlxalq çağırışlar fonunda İslamabad və Yeni Dehli arasında dialoq başlaya bilər. Nazir vurğulayıb ki, Hindistan toqquşmaları dayandıracağı təqdirdə, Pakistan da qarşılıq olaraq eyni addımı atmağa hazırdır:

“Onlar dayansa, biz də dayanarıq. Biz dağıntı və maliyyə vəsaitlərinin boş yerə xərclənməsini istəmirik. Heç bir ölkənin hegemonluğu olmadan bölgədə sülh arzulayırıq”.

Dar, ABŞ dövlət katibi Marko Rubio ilə apardığı telefon danışığında Vaşinqtona “top artıq Hindistanın tərəfindədir” mesajını verdiyini qeyd edib.

Gərginlik Hindistanın aprelin 22-də Cammu və Kəşmirin turistik Pahalqam bölgəsində baş verən və 26 mülki şəxsin ölümünə səbəb olan terror aktına görə məsuliyyəti Pakistana yükləməsi ilə artıb. Bu hadisədən sonra Hindistan ordusu Pakistan ərazisinə, o cümlədən Azad Kəşmir bölgəsinə raket zərbələri endirib.

Hindistan Müdafiə Nazirliyi hücumların hərbi obyektlərə deyil, BMT Təhlükəsizlik Şurasının terror siyahısında olan “Müqavimət Cəbhəsi” və “Ceyş-i-Məhəmməd” qruplarına məxsus 9 hədəfə yönəldiyini açıqlayıb.

Pakistan tərəfi isə hücumların mülki yaşayış məntəqələrinə tuş gəldiyini, nəticədə 31 nəfərin həlak olduğunu, 57 nəfərin yaralandığını bəyan edib. Hindistanın məlumatına görə, Pakistanın cavab zərbələri nəticəsində isə 16 nəfər həyatını itirib.

Tərəflər arasında artan gərginlik beynəlxalq ictimaiyyətin diqqətindədir və regionda sülhə nail olmaq üçün diplomatik təşəbbüslərin gücləndirilməsi gözlənilir.