İsrail regional vəziyyətin kəskin şəkildə gərginləşməsi fonunda ehtiyatda olan hərbçilərin genişmiqyaslı səfərbərliyinə start verib. Bu barədə İsrail Müdafiə Qüvvələrinin (IDF) Baş Qərargah rəisi, general-leytenant Eyal Zamir rəsmi açıqlama verib.

Qərar, İranın hərbi və nüvə obyektlərinə endirilmiş zərbələrdən sonra qəbul olunub. Eyal Zamir bildirib ki, hazırkı şərait İsrail ordusundan tam hazırlıq vəziyyətində olmağı tələb edir:

“Biz yalnız İrandan deyil, həmçinin Yəmən, Livan və Suriyadan da cavab zərbələri ehtimalını nəzərə alırıq. Bu səbəbdən ehtiyat qüvvələrin səfərbərliyi zəruridir.”

Səfərbərlik addımı regionda müharibə təhlükəsini artırır

İsrail mediasının məlumatına görə, səfərbərlik ölkə daxilində hərbi bazaların gücləndirilməsi, hava hücumundan müdafiə sistemlərinin aktivləşdirilməsi və strateji obyektlərin qorunmasını da əhatə edir.

Hazırda həm İsrail, həm də ona düşmən münasibət bəsləyən qüvvələrin yerləşdiyi Yaxın Şərq regionunda gərginliyin daha da artacağı gözlənilir.