Azərbaycan rəhbərliyinin Yeni Kaledoniya avantürası iflasa uğradı. 5 gün əvvəl oktyabr ayının 14-də Yeni Kaledoniya Konqresi 2024-cü ilin aprel ayının 18-də Azərbaycan parlamenti ilə imzalanmış “əməkdaşlıq” sazişinin ləğv edildiyin, bu sazişin hüquqi qüvvəsini itirdiyin bəyan etdi. Yeni Kaledoniya Konqresinin prezidenti Veylma xanım Falaeo Azərbaycan parlamenti ilə bu ilin aprelində imzalanmış sazişi birtərəfli qaydada etibarsız sənəd elan etdi. Müzakirələr zamanı 18 aprel sazişi Yeni Kaledoniyanın daxili işlərinə xarici müdaxilə kimi qiymətləndirildi.

Qeyd edilən sazişdən sonra təşkil edilən 13 may iğtişaşlarına görə “Bakı təşəbbüs qrupu” ilə əlaqədə olan 11 fəal həbs edildilər və hazırda onların istintaq prosesi gedir. Onlara qarşı irəli sürülən ittihamlardan biri də xaricdən maliyyə yardımı almaqla ölkədə insan ölümünə və xüsusi əmlakın talan edilməsinə gətirib çıxarmış iğtişaşlar törətməkdir. Məsələ araşdırma mərhələsindədir. Bir sözlə, kaledoniyalılar Bakının avantürasının qurbanı oldular.

Bu sazişi 2024-cü ilin aprel ayının 18-də Azərbaycan Milli Məclisinin sədri Sahibə Qafarova və Yeni Kaledoniya Konqresinin üzvü və Kənd Təsərrüfatı Agentliyinin sədri Omayra Naiselin imzalamışdılar. Bu sazişə görə Azərbaycan Milli Məclisi Yeni Kaledoniyanın Fransa müstəmləkəçiliyindən azad olmasına dəstək verməli idi. İşin qəribəliyi ondadır ki, Fransanın Sakit okeanda yerləşən bu xüsusi inzibati ərazidə adambaşına düşən Ümumi Daxili Məhsul (ÜDM) 37 700 dollardır və bu göstəriciyə görə Yeni Kaledoniya dünyada 33-cü yeri tutur. Biçarə Azərbaycanda isə adambaşına düşən ÜDM 6 842 Amerika dollarıdır və bizim ölkə bu göstəriciyə görə dünya ölkələri arasında 93-cü yeri tutur.

Ən gülməlisi odur ki, ÜDM-ə görə 93-cü yerdə dayanan ölkə, həmin göstəriciyə görə 33-cü yerdə olan ölkəni “azad” etmək istəyir. Əslində isə ÜDM göstəricisinə görə Azərbaycandan 6 dəfədən çox zəngin olan Yeni Kaledoniya Azərbaycanı əliyevlərin ailə müstəmləkəindən və Rusiya vassallığından azad etmək fikrinə düşəydi bu bir az anlaşılan olardı.

Yeni Kaledoniyanın Fransanın xüsusi inzibati ərazisi statusunda qalıb-qalmaması onların öz işidir. Hər halda bu məsələ ilə bağlı keçirilən son referendumda əhalinin mütləq çoxluğu Fransa ilə birlikdə qalmağa səs verib.

Azərbaycanın Rusiya siyasəti cazibəsində bu işə və eləcə də Moskva ilə birlikdə keçmiş Sovet və Putin Rusiyası agentura şəbəkəsi vasitəsi ilə “yeni müstəmləkəçiliyə” pul xərcləməsi taleyin qəribə ironiyasıdır. Bu ölkə üçün ağır nəticələr verə biləcək təhlükəli bir oyundur. Həmin pulların hər qəpiyinə Gürcüstan və Ermənistandan aşağı əmək haqqı və pensiya alan Azərbaycan xalqının əşhəddü ehtiyacı var, həmin pulların hər manatına 18 ildir uşaq pulu almayan Azərbaycan uşaqlarının çox böyük ehtiyacı var.