Məhkəmə prosesində Penitensiar Xidmətin üç əməkdaşı onu zorakılıqla şüşə kabinə salıblar

Aprelin 9-da Bakı Apelyasiya Məhkəməsində “İşçi Masası” Həmkarkar İttifaqları Konfederasiyasının sədri Afiəddin Məmmədovun apellyasiya şikayətinə baxılıb.

Afiəddin Məmmədov məhkəmədə çıxış edib.

O, çıxışını kağızdan oxuyarkən hakim Faiq Qəniyev onun sözünü yarıda kəsib və “məhkəmə prosesini səhnəyə çevirmə, emosionallıq göstərirsən, mahiyyəti üzrə danış” kimi sözlər deyib.

Hakim Afiəddinin çıxışını kəsməsinə baxmayaraq o, çıxışına davam edib.

Afiəddin çıxışını “Yaşasın işçilərin mübarizəsi!” deyərək bitirib. Həmin an Penitensiar Xidmətin üç nəfər əməkdaşı Afiəddin Məmmədovun əlindən kağızı zorakı şəkildə alaraq, onu məhkəmə zalındakı şüşə kabinə salıblar.

Hakimin müdaxiləsindən sonra nəzarətçilər kağızı vəkilə yox, hakimə təqdim ediblər. Kağız iş materiallarına əlavə edilib.

Prosesin sonunda Bakı Apelyasiya Məhkəməsi şikayəti təmin etməyib və birinci instansiya məhkəməsinin hökmü qüvvədə saxlanılıb.

Vəkili Zibeydə Sadıqova Ali Məhkəməyə şikayət edəcəklərini deyib.

Afiəddin Məmmədov 2025-ci il yanvarın 14-də Bakı Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib.

Ona qarşı Cinayət Məcəlləsinin 126.2.4 (qəsdən bədənə ağır xəsarət yetirmə-xuliqanlıq niyyətilə törədildikdə) və 221.3 (xuliqanlıq – silah və ya silah qismində əşyadan istifadə etməklə maddələrilə ittiham irəli sürülüb.

İctimai fəal Afiəddin Məmmədov bundan əvvəl də polisə müqavimət ittihamıyla bir neçə dəfə həbs olunub. Lakin o, bu ittihamların saxta olduğunu, ictimai fəaliyyətinə görə cəzalandırıldığını bildirib.

2023-cü il avqustun 1-də İşçi Masası Həmkarlar İttifaqları Konfederasiyasının üzvləri bir qrup moped sürən kuryerlə birlikdə polislərin onların nəqliyyat vasitələrini cərimə meydançasına aparmasına etiraz edib.

Etiraz aksiyası başa çatandan sonra Afiəddin Məmmədov yaşadığı evin yaxınlığında həbs edilib, ona 30 sutka inzibati həbs cəzası verilib.

Daha sonra avqustun 4-də Elvin Mustafayev, bir həftə sonra isə Ayxan İsrafilov narkotik ittihamı ilə həbs olunub.

Afiəddin Məmmədovun 30 sutkalıq cəzası başa çatandan sonra o, avqustun sonunda azadlığa buraxılsa da, sentyabrın 20-də yenidən həbs olunub.

Bu dəfə o, metronun “Həzi Aslanov” stansiyasının yaxınlığında yolda gedərkən Səfər Hüseynov adlı şəxsə mübahisə zəminində bıçaqla xəsarət yetirməkdə ittiham edilib.

Afiəddin Məmmədov məhkəmədə ifadəsində bildirib ki, o, Səfər Hüseynov adlı şəxsi tanımır.

Onun sözlərinə görə, hadisə də ittihamda yazıldığı kimi, Məhəmməd Hadi küçəsində yox, yaşadığı evin blokundan çıxanda baş verib.