“Qarabağ”ın baş məşqçisi Qurban Qurbanov UEFA Çempionlar Liqasının pley-off mərhələsinin bu gün keçirilən püşkatmasından sonra komandasının rəqibi “Nyukasl”la bağlı fikirlərini bölüşüb.

Təcrübəli mütəxəssis püşkün “Qarabağ” üçün uğurlu olmasını arzuladığını bildirib və mərhələlər irəlilədikcə rəqiblərin daha da gücləndiyini vurğulayıb. Onun sözlərinə görə, İngiltərə Premyer Liqa təmsilçisi ilə qarşılaşma xüsusi hazırlıq və əlavə güc tələb edir.

Qurbanov “Nyukasl”ın gücünü PSJ ilə keçirdiyi son oyunla da əsaslandırıb: “Liqa mərhələsinin son turunda PSJ ilə 1:1 hesablı heç-heçə etdilər. Bu da onu göstərir ki, hər iki komandanın səviyyəsi təxminən eynidir. Premyer Liqa klubuna qarşı oynamaq həmişə çətindir. İngiltərə çempionatı dünyanın ən güclüsüdür və orada komandalar arasında ciddi fərq olmur”.

Baş məşqçi rəqibin oyun üslubuna da toxunub: “Nyukasl” özünəməxsus oyun tərzinə malik, çox sürətli və ciddi komandadır. Bu mərhələdəki digər rəqiblərin heç birindən zəif deyil. Çalışacağıq ki, matça yaxşı hazırlaşaq, rəqibi daha yaxından tanıyaq və meydanda yaxşı oyun nümayiş etdirək”.

Qeyd edək ki, “Qarabağ” UEFA Çempionlar Liqasının pley-off mərhələsində “Nyukasl”la üz-üzə gələcək.