Xəbər verdiyimiz kimi, dünən Fransanın Strasburq şəhərində Avropa Şurası Parlament Assambleyasının (PACE) qış sessiyası çərçivəsində diqqətəlayiq mədəniyyət tədbiri — “Türkiyə Dokuma Atlası – Kumaşın Xatirəsi” adlı sərgi fəaliyyətə başlayıb. Bu gün isə sərginin rəsmi açılış mərasimi Avropa və beynəlxalq parlament üzvlərinin geniş iştirakı ilə baş tutub.

Tədbir Türkiyə Respublikasının Birinci Xanımı Emine Erdoğanın təşəbbüsü və himayəsi ilə təşkil olunub. Rəsmi açılış mərasimində Türkiyə Böyük Millət Məclisinin üzvü, PACE-də Türkiyə nümayəndə heyətinin təmsilçisi və Ankara millət vəkili Zeynep Yıldız çıxış edərək qonaqları salamlayıb. O, çıxışında Türkiyənin zəngin tarixi-mədəni irsi, xüsusilə də ənənəvi toxuculuq sənətinin ölkənin mədəni kimliyində tutduğu mühüm yer barədə ətraflı məlumat verib.

Zeynep Yıldız qeyd edib ki, “Türkiyə Dokuma Atlası – Kumaşın Xatirəsi” sərgisi təkcə estetik dəyərə malik mədəni layihə deyil, eyni zamanda nəsillərdən-nəsillərə ötürülən yaddaşın, tarix və mədəniyyətin canlı təcəssümüdür.

Tədbirdə çıxış edən Türkiyənin keçmiş Enerji və Təbii Sərvətlər naziri, nümayəndə heyətinin üzvü və millət vəkili cənab Fatih Dönmez sərginin əhəmiyyətini vurğulayaraq bildirib ki, bu cür mədəni təşəbbüslər Türkiyənin zəngin irsinin beynəlxalq platformalarda tanıdılmasına, mədəni diplomatiyanın güclənməsinə mühüm töhfə verir.

Avropa Şurası Baş katibinin müavini Björn Berge isə çıxışında sərginin Türkiyə mədəniyyətinin Avropa ictimaiyyətinə daha yaxından tanıdılması baxımından xüsusi önəm daşıdığını bildirib. O qeyd edib ki, bu kimi mədəni layihələr türk və Avropa xalqları arasında dostluq və qarşılıqlı anlayışın möhkəmlənməsinə, eləcə də Türkiyə–Avropa münasibətlərinin daha sıx və dərin inteqrasiyasına mühüm töhfə verir.

Sərgidə Türkiyənin müxtəlif bölgələrinə aid ənənəvi toxuculuq nümunələri, qədim naxışlar və sənətkarlıq elementləri nümayiş olunur. Layihə ziyarətçilərə türk mədəniyyətinin tarixi dərinliyini, estetik zənginliyini və mədəni yaddaşını yaxından tanımaq imkanı yaradır.

“Türkiyə Dokuma Atlası – Kumaşın Xatirəsi” sərgisi PACE qış sessiyası müddətində Strasburqda fəaliyyətini davam etdirəcək və beynəlxalq ictimaiyyətin böyük marağına səbəb olub.