USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
DYP sürücülərə müraciət etdi
Daxili İşlər Nazirliyinin Baş Dövlət Yol Polisi İdarəsi (BDYPİ) sürücülərə müraciət edib.
Müraciətdə bildirilib ki, həftəsonları respublika əhəmiyyətli avtomobil yollarında nəqliyyat vasitələrinin sayının əhəmiyyətli dərəcədə artması yol hərəkəti təhlükəsizliyinə xüsusi diqqət tələb edir. Xüsusilə istirahət günlərində şəhərdənkənar istiqamətlərə, turizm və istirahət zonalarına yönələn intensiv hərəkət axını fonunda baş verən yol-nəqliyyat hadisələri əksər hallarda sürücülərin tələskənliyi, diqqətsizliyi və yol şəraitini düzgün qiymətləndirməməsi ilə əlaqədar olur.
BDYPİ qeyd edib ki, həftəsonları avtomobil yollarında nəzarət-profilaktik tədbirlər gücləndirilsə də, yol təhlükəsizliyinin təmin edilməsi yalnız inzibati nəzarətlə məhdudlaşmır. Yollarda təhlükəsiz mühitin formalaşması ilk növbədə hər bir sürücünün şəxsi məsuliyyətindən və sükan arxasında nümayiş etdirdiyi davranışdan asılıdır.
Müraciətdə səfərə çıxan sürücülərə texniki cəhətdən nasaz nəqliyyat vasitəsi ilə yola çıxmamaq, yorğun və yuxusuz halda avtomobil idarə etməmək, ara məsafəsini qorumaq, sürət həddini aşmamaq, ötmə və manevr qaydalarına ciddi əməl etmək tövsiyə olunub. Vurğulanıb ki, bu qaydaların pozulması yol-nəqliyyat hadisəsi riskini dəfələrlə artırır və bir çox hallarda ağır nəticələrə səbəb olur.
Xüsusilə uzun məsafəli səfərlər zamanı sürücülərin mütəmadi fasilələr verməsi, avtomobilin texniki vəziyyətini əvvəlcədən yoxlaması və yol şəraitinə uyğun hərəkət etməsinin vacibliyi diqqətə çatdırılıb.
