Avstraliyanın Sidney şəhərində, Bondi çimərliyində yəhudiləri hədəf alan silahlı hücum baş verib. Yerli polisin verdiyi məlumata görə, dekabrın 14-də çimərlikdə yəhudi bayramı Hanukka münasibətilə keçirilən tədbir zamanı silahlı şəxslər iştirakçılara atəş açıblar.

Bildirilir ki, mindən çox insanın qatıldığı tədbirdə ən azı 11 nəfər yerindəcə həyatını itirib, 29 nəfər isə müxtəlif dərəcəli xəsarətlərlə xəstəxanaya yerləşdirilib.

Polisin məlumatına əsasən, hücumu törədən silahlılardan biri hadisə yerində zərərsizləşdirilərək öldürülüb, digərinin isə vəziyyətinin ağır olduğu bildirilir. Hadisə yerinə baxış zamanı partlayıcı maddələrlə dolu avtomobil də aşkar edilib. Avtomobilin zərərsizləşdirilməsi üçün xüsusi təyinatlı mütəxəssislər cəlb olunub.

Avstraliyanın Baş naziri Entoni Albaniz baş verənləri sərt şəkildə pisləyərək hücumu “ölkənin ürəyini hədəf alan şər, antisemit terror aktı” kimi qiymətləndirib.

Hadisə ilə bağlı istintaq davam edir, təhlükəsizlik tədbirləri gücləndirilib. Rəsmi qurumlar yaxın saatlarda əlavə məlumatın açıqlanacağını bildiriblər.