Zəngəzur dəhlizi bir neçə mühüm nəqliyyat və iqtisadi marşrutu özündə birləşdirən genişmiqyaslı layihədir.

Bunu Azərbaycan Prezidentinin xüsusi tapşırıqlar üzrə xüsusi nümayəndəsi Elçin Əmirbəyov Polşanın “TVP World” telekanalına müsahibəsində bildirib.

Onun sözlərinə görə, cari ilin avqustunda Vaşinqton sammitinin nəticəsi olaraq razılaşdırılan “Tramp Marşrutu” (TRIPP) layihəsi Zəngəzur dəhlizinin tərkib hissəsidir.

Elçin Əmirbəyov qeyd edib ki, Zəngəzur dəhlizi bir neçə strateji məqsədə eyni vaxtda nail olmağa imkan verəcək:
• Azərbaycanın əsas hissəsini Naxçıvanla birləşdirəcək;
• Üç onillik fasilədən sonra Ermənistanla Azərbaycan arasında nəqliyyat əlaqəsini bərpa edəcək;
• Asiya ilə Avropa arasında alternativ və mühüm ticarət marşrutu rolunu oynayacaq.

“Bu marşrut Asiya və Avropa arasında ticarət həcmlərinin hər iki istiqamətdə artmasına şərait yaradacaq. Biz Cənubi Qafqazda dayanıqlı sülhün bərqərar olmasını istəyirik və bu səbəbdən Bakı və İrəvan ABŞ-nin vasitəçiliyi ilə sülhün bərabər iqtisadi faydalar gətirməsi barədə razılığa gəliblər. Bu proses nəticə etibarilə Ermənistan və Azərbaycan arasında iqtisadi qarşılıqlı asılılıq yarada və vahid iqtisadi məkan formalaşdıra bilər”, – deyə o vurğulayıb.

Xüsusi nümayəndə bildirib ki, 2025-ci il Bakı və İrəvan arasında münasibətlərdə, eləcə də bütün Cənubi Qafqaz üçün dönüş nöqtəsi olacaq. Onun sözlərinə görə, uzun illər davam edən münaqişədən sonra tərəflər sülh qurmaq qərarına gəliblər.

Elçin Əmirbəyov xatırladıb ki, 8 avqust Vaşinqton sammiti Azərbaycan və Ermənistan liderlərinin möhkəm və dönməz sülhə sadiqliyini nümayiş etdirən mühüm hadisə olub.

“Ermənistanın Azərbaycana qarşı ərazi iddiaları aradan qaldırıldıqdan sonra Bakı sülh sazişi layihəsi üzərində işləməyi təklif etdi. İki il yarımlıq danışıqlardan sonra, 2025-ci ilin martında sülh sazişi layihəsinin mətni razılaşdırıldı”, – deyə o əlavə edib.

Əmirbəyov həmçinin bildirib ki, Vaşinqton sammiti zamanı Azərbaycan, Ermənistan və ABŞ liderləri hər üç tərəf üçün əhəmiyyətli iqtisadi nəticələr vəd edən razılaşmalara nail olublar.