2023-cü il Nobel Sülh Mükafatının laureatı, hüquq müdafiəçisi Nərgiz Məhəmmədinin İranda saxlanıldığı bildirilir.

Bu barədə fəalın yaxınları məlumat yayıb. Məhəmmədinin Parisdə yaşayan həyat yoldaşı Tağı Rəhmani “X” sosial şəbəkəsində yazıb ki, hüquq müdafiəçisi Məşəd şəhərində keçirilən tədbir zamanı digər tanınmış fəal Sepide Qolyan ilə birlikdə saxlanılıb. Məlumatı Məhəmmədinin tədbirdə iştirak edən qardaşı da təsdiqləyib.

İran hüquq-mühafizə orqanları 53 yaşlı fəalın saxlanılması ilə bağlı hələlik rəsmi açıqlama verməyib.

Bununla belə, tərəfdarları son aylarda Nərgiz Məhəmmədinin yenidən həbs olunma riski ilə üz-üzə qaldığı barədə xəbərdarlıqlar edirdilər. O, daha əvvəl səhhətindəki ciddi problemlərlə əlaqədar 2024-cü ilin dekabrında müvəqqəti olaraq azadlığa buraxılmışdı.

Nərgiz Məhəmmədi İranda ölüm cəzasına və məcburi hicaba qarşı apardığı kampaniyaya görə 2021-ci ilin noyabrından müxtəlif ittihamlarla həbsdə saxlanılıb. Tərəfdarlarının bildirdiyinə görə, o, həbsdə olduğu müddətdə bir neçə dəfə ürək tutması keçirib, 2022-ci ildə isə təcili cərrahi əməliyyat olunub.

Məhəmmədinin cəzasının üç həftəlik dayandırılması nəzərdə tutulsa da, beynəlxalq təzyiqlər və Qərb ölkələrinin çağırışları nəticəsində onun azadlıqda qalma müddəti uzadılmışdı.