2025-ci il yanvarın 18-də İmişlidə Dövlət Yol Polisi avtomobilinin törətdiyi və üç azyaşlının ölümü ilə nəticələnən qəzanın ardınca keçirilən etiraz aksiyasında iştirak etdiklərinə görə saxlanılan şəxslərə iyulun 3-də İmişli Rayon Məhkəməsində hökm oxunub.

Hakim Zaur Pirverdiyevin sədrliyi ilə keçirilən prosesdə 20-dən çox şəxsə müxtəlif cəzalar verilib. Onlardan bir qismi azadlıqdan məhrumetmə, digərləri isə azadlığın məhdudlaşdırılması cəzası alıb.

Azadlıqdan məhrumetmə cəzası alanlar:
• Nazim Əliyev – 1 il (şərti)
• Taleh Məmmədov – 4 il
• Ruslan Quliyev – 2 il
• Kənan Mejdunov – 4 il
• Rahib Rzayev – 4 il

Azadlığın məhdudlaşdırılması cəzası alanlar:
• Canpolad Əliyev – 1 il
• Hüseyn Cabbarlı – 3 il
• Elman İbrahimov – 1 il
• Sənan Əliyev – 1 il 6 ay
• Vüqar Usublu – 2 il
• Abbas Bağırov – 1 il 6 ay
• Rahib Tağıyev – 3 il
• Elxan Əzimov – 1 il 6 ay
• Fərid Seyidzadə – 3 il
• Qoşqar Məmmədov – 3 il
• Eldar Ağazadə – 1 il
• Elnur Babayev – 2 il
• Rasif Babayev – 4 il
• Şamil Səfərov – 2 il

Məlumata görə, Nazim Əliyevə verilən 1 illik cəza şərti hesab olunub və o, azadlıqda qalacaq.


Hadisənin xronikası

Yanvarın 18-də DYP-yə məxsus avtomobil məktəbdən çıxan 4 şagirdi vurub. Hadisə yerində 2 uşaq ölüb, biri xəstəxanada həyatını itirib, digəri isə xəsarət alıb. Sürücü polis əməkdaşı da yaralanıb. Qəzanın videosu DİN tərəfindən yayılsa da, polis maşınının sürəti barədə aydınlıq əldə olunmayıb.

Qəzadan sonra yerli sakinlər, xüsusilə gənclər, polisə etiraz olaraq küçələrə axışıb, DYP maşınını aşırıb və İmişli Rayon Polis İdarəsinə doğru yürüş ediblər. Aksiyalardan sonra onlarla insan saxlanılıb, bir çoxuna inzibati həbs verilib. Sosial şəbəkələrdə yayılan məlumatlara görə, Daxili Qoşunlar İmişliyə yeridilib, şəhərdə internet kəsilib, meydanlar və inzibati binalar polis nəzarətinə alınıb.

Etirazlara görə saxlanılan şəxslərə Cinayət Məcəlləsinin 221.2.1-ci (bir qrup şəxs tərəfindən xuliqanlıq) maddəsi ilə ittiham irəli sürülüb. Onların əksəriyyəti yanvarın 22-də 3 ay müddətinə ilkin həbsə alınmışdı.

Buna baxmayaraq, qəzaya səbəb olan polis əməkdaşı ilə bağlı heç bir rəsmi açıqlama verilməyib. Sosial mediada yayılan məlumatlara görə, həmin şəxs keçmiş deputat və iş adamı Əhəd Əhmədovun qardaşı oğludur.

Hadisə və məhkəmə qərarları ictimaiyyət arasında geniş narazılığa səbəb olub. Sosial şəbəkələrdə ədalətli istintaq və cavabdeh polisin cəzalandırılması tələb olunur.