USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Hafiz Babalı: “Mediamız natəmiz məlumatlarla çirkləndirilir”
“Abzas Media işi” çərçivəsində həbs edilən araşdırmaçı jurnalist Hafiz Babalı Audiovizual Şuraya və Medianın İnkişafı Agentliyinə (MEDİA) müraciət ünvanlayıb.
O, müraciətində bir sıra xəbər saytlarının və televiziya kanallarının onun haqqında birtərəfli, böhtan xarakterli yazılar dərc etdiyini, bu yolla işgüzar nüfuzunun ləkələnməsinə cəhd göstərildiyini bildirib.
Babalının sözlərinə görə, həbsindən az sonra – 2023-cü ilin dekabrında bəzi saytlar onun barəsində “dezinformasiya xarakterli” material yayıb və bu yazılar digər media orqanları tərəfindən də tirajlanıb. O, həmin yazılarla bağlı məhkəmələrə müraciət etdiyini xatırladıb.
Jurnalist qeyd edib ki, 2025-ci ilin mayında “Baku TV”də yayımlanan və sonradan digər media resursları tərəfindən dərc edilən materialda da eyni şəkildə onun mövqeyinə yer verilmədən böhtan xarakterli iddialar səsləndirilib. Bu səbəbdən Babalı kanalı məhkəməyə verib.
Onun sözlərinə görə, “qafqazinfo.az” saytına qarşı apellyasiya şikayətinə oktyabrın 21-də, “Baku TV”yə qarşı mülki iddiasına isə sentyabrın 4-də Nəsimi Rayon Məhkəməsində baxılacaq.
Hafiz Babalı müraciətində dövlət qurumlarını bu proseslərdə iştirak etməyə və mediada böhtan, birtərəfli məlumatların qarşısını almağa çağırıb:
“Mediamız bu cür natəmiz məlumatlarla çirkləndirilməkdədir, dövlət qurumları isə sanki bu halları görmür. Halbuki ‘Media haqqında’ qanun şərəf və ləyaqətin alçaldılmasına, işgüzar nüfuzun ləkələnməsinə yol verilməməsini tələb edir. Mənim nümunəmdə isə bunun əksi baş verir”.
O həmçinin xatırladıb ki, MEDİA dezinformasiya ilə mübarizə üçün yüz minlərlə manatlıq layihələr həyata keçirsə də, bəzi media orqanları hələ də cəzasız qalır.
