“Abzas Media işi” çərçivəsində həbs edilən araşdırmaçı jurnalist Hafiz Babalı bir neçə hökumətyönlü media qurumunu məhkəməyə verib. Bu barədə məlumatı jurnalistin ailəsi “Abzas Media”ya verib.

Ailənin verdiyi məlumata görə, Hafiz Babalı ona “böhtan atdıqlarına görə” “Baku TV”, “Qafqazinfo”, “Report.az” və digər media resurslarının məhkəmə qaydasında cəzalandırılması üçün iddia qaldırıb. O, bu qurumları yalan və təhqiramiz məlumat yaymaqda, işgüzar nüfuzunu zədələməkdə ittiham edir.

Xüsusilə “Baku TV” telekanalının 2 may 2025-ci il tarixli “Anonim bank kartları, məxfiləşdirilmiş elektron kanallar, mənzil-ofislər | Niyə?” başlıqlı süjetində Hafiz Babalının fotoları göstərilib və onun barəsində ciddi ittihamlar səsləndirilib. Süjetdə jurnalist “Abzas Media” əməkdaşı kimi təqdim olunub və 2020–2023-cü illərdə xarici ölkələrə, o cümlədən Gürcüstana səfər edərək guya qaçaqmalçılıq yolu ilə ölkəyə valyuta gətirməkdə, qanunsuz sahibkarlıqla məşğul olmaqda və əldə etdiyi vəsaitləri digər əməkdaşlarla bölüşməkdə ittiham olunub.

Hafiz Babalı məhkəməyə təqdim etdiyi pretenziyada bildirib ki, yayımlanan bu materiallar tamamilə yalandır və onun jurnalist kimi işgüzar nüfuzuna ciddi zərbə vurur. O qeyd edib ki, istintaq dövründə verdiyi ifadələrdə Ülvi Həsənli və Sevinc Vaqifqızı ilə olan əlaqələrinin sırf araşdırma xarakterli olduğunu bəyan edib:

“İstintaq materiallarında da mənim onlarla olan yazışmalarım jurnalist araşdırmaları ilə bağlı kommunikasiya kimi qiymətləndirilib.”

Babalı əlavə edib ki, məhkəmə hökmü olmadan onun fotolarını və adını yayımlayaraq barəsində yalan məlumatların ictimailəşdirilməsi jurnalist kimi fəaliyyətinə zərər vurur.

Qeyd edək ki, Hafiz Babalı daha əvvəl də “Qafqazinfo”, “ATV” və “İki Sahil” qəzetini məhkəməyə vermiş, lakin uzun sürən prosesdən sonra məhkəmə onun iddialarını təmin etməmişdi.

2023-cü ilin dekabrında həbs edilən Hafiz Babalı ilə yanaşı, “Abzas Media”nın direktoru Ülvi Həsənli, koordinatoru Məhəmməd Kekalov, baş redaktoru Sevinc Vaqifqızı, jurnalistlər Nərgiz Absalamova, Elnarə Qasımova və “Azadlıq Radiosu”nun əməkdaşı Fərid Mehralızadə də saxlanılıb. Onlar qaçaqmalçılıq və digər ittihamlarla Bakı Ağır Cinayətlər Məhkəməsində mühakimə olunublar.

2025-ci il iyunun 20-də çıxarılan hökmlə Ülvi Həsənli, Sevinc Vaqifqızı, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il müddətinə azadlıqdan məhrum ediliblər.

Jurnalistlər ittihamları rədd edir və bu həbslərin korrupsiya ilə bağlı araşdırmalarına görə həyata keçirildiyini bildirirlər.