Avropa Şurasının Nazirlər Komitəsi 15–17 sentyabr tarixlərində keçirilən iclasının nəticələrini açıqlayıb. İclasda Avropa İnsan Hüquqları Məhkəməsinin (AİHM) qərar və hökmlərinin icrasına nəzarət məsələləri müzakirə olunub və bu istiqamətdə bir sıra qərarlar qəbul edilib.

Komitənin məlumatına görə, ümumilikdə 22 dövlətlə bağlı 45 qərar qəbul olunub. Bunlar arasında Azərbaycanla bağlı xüsusi vurğular da yer alıb. Xüsusilə, “Məmmədli Azərbaycana qarşı” və “Mahmudov və Ağazadə Azərbaycana qarşı” işlərində aralıq qətnamələr təsdiqlənib.

Nazirlər Komitəsi Azərbaycanda jurnalistlərin və media nümayəndələrinin həbslərinin artmasına diqqət çəkib. Qurum bildirib ki, son illərdə bu sahədə vəziyyətin daha da pisləşməsi müşahidə olunur və ifadə azadlığı ilə bağlı problemlər Avropa Şurasının gündəmində qalmaqda davam edir.

Hesabatda qeyd edilir ki, Azərbaycan hökuməti AİHM-in müvafiq qərarlarını icra etməyə borcludur. Bu qərarların yerinə yetirilməməsi ölkədə insan hüquqlarının müdafiəsi sahəsində öhdəliklərin pozulması kimi qiymətləndirilir.

Avropa Şurası rəsmiləri vurğulayıblar ki, Azərbaycan hakimiyyəti jurnalistlərə qarşı təzyiq, qanunsuz həbslər və mediaya məhdudiyyətlər məsələsində təcili addımlar atmalı, həmçinin AİHM-in qərarlarını icra etməklə hüquqi islahatları təmin etməlidir.

Qeyd edək ki, “Məmmədli Azərbaycana qarşı” işi vətəndaş cəmiyyəti fəallarına qarşı məhdudiyyətlər, “Mahmudov və Ağazadə Azərbaycana qarşı” işi isə jurnalistlərin ifadə azadlığının pozulması ilə bağlıdır. Hər iki iş illərdir Avropa Şurasının nəzarət mexanizmlərində qalıb.