Azərbaycan pasportu ilə vizasız səfər etmək mümkün olan ölkələrin sayı 20-ni ötüb.

Bunu Milli Məclisin Beynəlxalq münasibətlər və parlamentlərarası əlaqələr komitəsinin bu gün keçirilən iclasında komitə sədri Səməd Seyidov deyib.

O, “Azərbaycan Respublikası Hökuməti ilə İordaniya Haşimilər Krallığı Hökuməti arasında ümumvətəndaş pasport sahiblərinin viza tələbindən qarşılıqlı azad edilməsi haqqında Saziş”in təsdiq edilməsi barədə qanun layihəsinin müzakirəsi zamanı Azərbaycan pasportunun imkanlarının getdikcə genişləndiyini bildirib.

“Azərbaycan pasportunun gücü göz qabağındadır, getdikcə güclənir və Azərbaycan vətəndaşının vizasız gedə bildiyi ölkələrin sayı arta-arta gedir. Onların sayı artıq 20-ni ötüb. Burada ümumvətəndaş pasportundan söhbət gedir”, - deyə Səməd Seyidov qeyd edib.

Komitə sədri Azərbaycan vətəndaşlarının İordaniyaya vizasız səfər imkanlarının genişlənməsini də mühüm hadisə kimi qiymətləndirib.

Onun sözlərinə görə, yeni sazişə əsasən Azərbaycan vətəndaşları 180 günlük müddət ərzində 90 günədək İordaniyada vizasız qala biləcəklər.

“180 günün 90 günü çərçivəsində Azərbaycan vətəndaşı vizasız İordaniyada tam sərbəst qala bilir. Bu, böyük nailiyyətdir”, - deyə komitə sədri bildirib.