Sentyabrın 21-də Bakı Ağır Cinayətlər Məhkəməsində Prezident Administrasiyasının sabiq rəhbəri Ramiz Mehdiyev və onun keçmiş köməkçisi Eldar Əmirovun cinayət işi üzrə hazırlıq iclası keçirilib.

Hakim Murad Aslanovun sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib, onlara hüquq və vəzifələri izah olunub.

Məhkəmə cinayət işinin baxışa təyin edilməsi barədə qərar qəbul edib. Növbəti iclasın tarixi hələ açıqlanmayıb.

Ramiz Mehdiyev barəsində 2025-ci ilin oktyabrında Dövlət Təhlükəsizliyi Xidmətində cinayət işi başlanıb. Oktyabrın 14-də Səbail Rayon Məhkəməsi onun barəsində dörd aylıq ev dustaqlığı qətimkan tədbiri seçib. Sonradan bu müddət bir neçə dəfə uzadılıb.

Həmin ilin noyabrında bu iş üzrə Eldar Əmirov da saxlanılıb. Noyabrın 29-da isə Azərbaycan Xalq Cəbhəsi Partiyasının sədri Əli Kərimli və partiyanın Ali Məclisinin katibi Məmməd İbrahim həbs olunublar.

DTX-nin 2026-cı ilin əvvəlində yaydığı açıqlamada Ramiz Mehdiyev, Əli Kərimli və Məmməd İbrahimlə yanaşı, baş nazirin keçmiş birinci müavini Abbas Abbasovun və digər şəxslərin də adları çəkilib.

Qurum həmin şəxslərdən bəzilərinin xarici xüsusi xidmət orqanlarının dəstəyi ilə Azərbaycanda hakimiyyəti zorla ələ keçirmək və konstitusiya quruluşunu dəyişdirmək məqsədilə fəaliyyət göstərdiyini iddia edib.

Əli Kərimli və Məmməd İbrahim konstitusiya quruluşunu zorla dəyişdirməyə yönələn hərəkətlərdə ittiham olunurlar. Onlar ittihamları rədd edir və həbslərinin siyasi sifariş olduğunu bildirirlər.