USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azər Qasımlının işi üzrə məhkəmədə ziddiyyətli ifadələr ortaya çıxıb
Sentyabrın 24-də Bakı Ağır Cinayətlər Məhkəməsində Siyasi Menecment İnstitutunun direktoru, politoloq Azər Qasımlının işi üzrə növbəti məhkəmə iclası keçirilib.
Prosesdə istintaq tərəfindən zərərçəkən qismində tanınan Qurbanəli Yusifov müdafiə tərəfinin suallarını cavablandırıb. Vəkillərin sözlərinə görə, iclasa sədrlik edən hakim Telman Hüseynov bir sıra hallarda onların suallarını yarımçıq kəsib, hətta Yusifovun əvəzinə cavab verib.
Müdafiə tərəfi Yusifovun ifadələrində ciddi ziddiyyətlər olduğunu diqqətə çatdırıb. Belə ki, o, birinci ifadəsində zəngi Antalyada aldığı, sonrakı ifadəsində isə Bakıda olduğu barədə məlumat verib. Ziddiyyətin səbəbini isə izah edə bilməyib.
Bundan əlavə, Yusifov istintaqa zəngin edildiyi nömrənin ekran görüntüsünü təqdim etdiyini desə də, iş materiallarında belə bir dəlil qeydə alınmayıb.
Vəkillərin Yusifovun ifadələrinin saxta olduğunu əsas gətirərək sübutlar siyahısından çıxarılması barədə verdikləri vəsatət qəbul edilməyib. Hakim vəkilin vəsatəti sona qədər oxumasına imkan verməyib.
Məhkəmənin növbəti iclası oktyabrın 1-nə təyin olunub. Bu dəfə Azər Qasımlının ifadəsi dinləniləcək.
