Sentyabrın 10-da Bakı Ağır Cinayətlər Məhkəməsində Siyasi Menecment İnstitutunun direktoru, politoloq Azər Qasımlının məhkəmə prosesi davam edib. Prosesə hakim Telman Hüseynov sədrlik edib.

Azər Qasımlı 2024-cü il dekabrın 8-də saxlanılıb və ona qarşı Cinayət Məcəlləsinin 182.2.3-cü maddəsi (hədə-qorxu ilə tələb etmə, zor tətbiq etməklə törədildikdə) ilə ittiham irəli sürülüb. Politoloq ittihamların qondarma, həbsi isə siyasi sifariş olduğunu bəyan edib.

Məhkəmədə zərərçəkmiş kimi tanınan Qurbanəli Yusifov ifadəsində etiraf edib ki, Qasımlı ondan özgəsinin yox, öz pulunu istəyib. Bu barədə Azər Qasımlının həyat yoldaşı Samirə Qasımlı Meydan TV-yə danışıb:

“Azərə qarşı irəli sürülən ittiham Cinayət Məcəlləsinin 182.2 maddəsi – özgənin əmlakını hədə-qorxu ilə tələb etmədir. Ona görə Azər Yusifova konkret sual verdi ki, mən səndən sənin şəxsi pulunu istəmişəm? Qurbanəli Yusifov isə cavab verdi ki, ‘xeyr, istəməmisən’. Bu cavab artıq ittihamı qüvvədən salır. Çünki Azər ondan özgəsinin yox, öz pulunu istəyib”.

Samirə Qasımlı bildirib ki, məhkəmədə şahid kimi göstərilən Yusifovun valideynləri və xalası oğlu istintaq materiallarında şahid qismində görünmür. Onun sözlərinə görə, Yusifov da etiraf edib ki, ailəsi Azər Qasımlının ona hədə-qorxu gəlməsi barədə məlumatı yalnız sosial şəbəkələrdən öyrənib.

Eyni zamanda məlum olub ki, Qurbanəli Yusifov Azər Qasımlı barədə məhkəməyə müraciət etmək niyyətində olmayıb. O, yalnız Mingəçevir Rayon Məhkəməsinin Qasımlının xeyrinə qərarından sonra Daxili İşlər naziri Vilayət Eyvazova məktub yazıb.

Samirə Qasımlının sözlərinə görə, vəkil məhkəmədə Yusifova həmin məktub barədə sual verib:

“O məktubda yazmısınız ki, Azər Qasımlı sizi dövlətçilik əleyhinə qaldırırdı, planları baş tutmayanda isə hədə-qorxu gəlməyə başladı. Bu iddia ilə nəyi nəzərdə tuturdunuz?”

Yusifov isə cavabında “variantlar fikirləşirdim, ona görə belə yazdım” deyib. Samirə Qasımlı qeyd edib ki, bu cavabdan sonra zalda gülüş yaranıb.