Mayın 21-də Yasamal Rayon Məhkəməsi siyasətçi Azər Qasımlının həbs qətimkan tədbirinin ev dustaqlığı ilə əvəzlənməsi ilə bağlı vəkilinin verdiyi vəsatətə baxıb. “Abzas Media”nın məlumatına görə, məhkəmə vəsatəti təmin etməyərək Qasımlının həbsdə saxlanılması barədə qərarı qüvvədə saxlayıb.

Azər Qasımlı hazırda Cinayət Məcəlləsinin 182.2.3-cü maddəsi (zor tətbiq etməklə hədə-qorxu ilə tələb etmə) ilə ittiham olunur. O, 2023-cü il dekabrın 8-də saxlanılıb və barəsində ilkin olaraq həbs qətimkan tədbiri seçilib. Bu il aprelin 3-də onun həbs müddəti daha iki ay uzadılıb.

Azər Qasımlı Siyasi Menecment İnstitutunun direktorudur və prezident İlham Əliyevin əsas tənqidçilərindən biri kimi tanınır. O, öz həbsi ilə bağlı bildirib ki, bu, siyasi sifariş əsasında həyata keçirilib və irəli sürülən ittihamlar əsassızdır.

Qasımlı bundan əvvəl 2018-ci ildə keçirilmiş kütləvi aksiya zamanı liderlik etdiyi üçün 30 gün inzibati qaydada həbs olunmuşdu.

2023-cü ilin noyabrından başlayaraq Azərbaycanda media və vətəndaş cəmiyyətinə qarşı yeni repressiya dalğası müşahidə olunur. Hüquq müdafiəçilərinin məlumatına görə, hazırda ölkə üzrə 365-dən çox siyasi məhbus var. Saxlanılan şəxslər ittihamların saxta, həbslərin isə siyasi motivli olduğunu bildirirlər. Repressiyalar çərçivəsində jurnalistlər, hüquq müdafiəçiləri və müxalif fəallar ard-arda istintaqa cəlb edilir.