Siyasi Menecment İnstitutunun direktoru, tanınmış politoloq Azər Qasımlının cinayət işi üzrə Bakı Ağır Cinayətlər Məhkəməsində iyulun 16-da keçirilən məhkəmə iclasında ona qarşı rəsmi ittiham elan olunub. Prosesə hakim Telman Hüseynov sədrlik edib.

İclasda politoloqun vəkili vəsatət qaldıraraq müvəkkilinin məhkəmə prosesi zamanı onun yanında əyləşərək iştirak etməsinə şərait yaradılmasını istəyib. Məhkəmə müşavirədən sonra vəsatəti təmin edib və Azər Qasımlının vəkili ilə birgə oturaraq müdafiəsini həyata keçirməsinə icazə verilib.

Ardınca dövlət ittihamçısı Valeh Ələkbərov tərəfindən Azər Qasımlıya qarşı Cinayət Məcəlləsinin 182.2.3-cü maddəsi (hədə-qorxu ilə tələbetmə, zor tətbiq etmə ilə törədildikdə) üzrə rəsmi ittiham elan olunub. Hakim proses iştirakçılarının diqqətinə çatdırıb ki, bu maddə üzrə 10 ildən 15 ilə qədər azadlıqdan məhrumetmə cəzası nəzərdə tutulur.

Azər Qasımlı isə ittihama kəskin etiraz edərək, onu əsassız və ədalətsiz adlandırıb:
“Onu ittiham aktı yox, özümə qarşı antiittiham adlandırardım. Özümü nəinki təqsirli bilmirəm, hətta zərərçəkmiş hesab edirəm. Mənə borclu olduğunu məhkəmədə özü də etiraf edib”, – deyə politoloq bildirib.

İttihama görə, Azər Qasımlı kriptovalyuta alqı-satqısından gəlir itkisi ilə bağlı tanışı Qurbanəli Yusifovla mübahisə edib, onu və ailəsini öldürməklə hədələyərək 45 min dollar tələb edib. İddialara əsasən, o, bu yolla 6800 manat alıb və Yusifova 10 min dollar məbləğində qəbz imzalatdırıb.

Müdafiə tərəfi isə bildirir ki, əslində bu işdə zərərçəkmiş rolunda Qasımlı dayanır. Vəkilləri Azər Qasımlının Qurbanəli Yusifovla arasında daha əvvəl Mingəçevir Şəhər Məhkəməsində mülki qaydada baxılmış iş üzrə qalib gəldiyini xatırladıb. Şəki Apellyasiya Məhkəməsi isə bu qərarı ləğv edərək, mübahisəyə kommersiya məhkəməsində baxılmalı olduğunu bildirib. Hazırda bu iş yenidən kommersiya instansiyasında araşdırılır.

Vəkil Aqil Layıc:
“Bu məsələlər ətraflı araşdırılsa, aydın olacaq ki, Azər Qasımlı özü dələduzluğun qurbanıdır”.

Proses zamanı vəkillər Qasımlı ilə Yusifov arasında yazışmaların, əvvəlki məhkəmə iclaslarının protokollarının və digər sənədlərin cinayət işinə əlavə olunmasını istəyib. Məhkəmə bu sənədlərə sənədlərin tədqiqi mərhələsində baxılacağını bildirib.

Zərərçəkmiş Qurbanəli Yusifovun ifadəsi isə onun məhkəməyə gəlməməsi səbəbindən növbəti – iyulun 30-na təyin olunan iclasa təxirə salınıb. Bundan sonra Azər Qasımlının ifadə verəcəyi gözlənilir.

Qeyd edək ki, Azər Qasımlı 8 dekabr 2024-cü il tarixində saxlanılıb və o vaxtdan həbsdədir. Politoloq öz həbsi və ona qarşı açılan cinayət işini siyasi fəaliyyəti və tənqidi çıxışları ilə əlaqələndirir. O həmçinin, həbsindən əvvəl ölkədən çıxışına qoyulan qadağaya diqqət çəkərək siyasi təzyiqlərin hədəfində olduğunu bildirir.