Onlar “dövlət əleyhinə təbliğat”, “milli təhlükəsizliyə qarşı fəaliyyət məqsədilə toplaşma və əlbir olmaq” və “casusluq” ittihamları ilə məhkum ediliblər

“Human Rights Watch” (HRW) beynəlxalq insan haqları təşkilatı fevralın 14-də yaydığı məlumatda bildirib ki, İran hakimiyyəti 2024-cü ilin oktyabrından etibarən azı 24 azərbaycanlı fəala ağır həbs cəzası verib.

Onlar “dövlət əleyhinə təbliğat”, “milli təhlükəsizliyə qarşı fəaliyyət məqsədilə toplaşma və əlbir olmaq” və “casusluq” ittihamları ilə məhkum ediliblər.

Verilən həbs cəzalarının müddəti 3 ildən 14 ilə qədərdir.

“Human Rights Watch”un İran üzrə tədqiqatçısı Nahid Naqşbəndi bildirib ki, İran hakimiyyəti sistematik olaraq vətəndaş cəmiyyəti və etnik azlıqları təhqiramiz ittihamlarla və müxalifləri susdurmaq üçün ağır həbs cəzaları ilə hədəfə alır.

“Bu repressiya vətəndaş cəmiyyətini əzmək və etnik azlıqların öz əsas hüquqlarını tələb etməsinə mane olmaq cəhdidir”, – Nahid Naqşbəndi qeyd edib.

10 azərbaycanlı fəalın işi üzrə Ayaz Seyfxah 14 il, Araz Aman Zeinabad və Baqir Hacızadə Məzrə 13 il, Kərəm Mərdanə Mustalıbəyoğlu 11 il, Tahir Nəqəvi və Mürtəza Pərvin Coda 6 il, Salar Tahir Əfşar, Fatimə Atəş Xiyavi və Səid Minai Qışlaq 5 il, Həsən İbrahimi isə 3 il həbs cəzasına məhkum edilib.

“İnsan Haqları Fəalları” Xəbər Agentliyi 10 nəfərin hamısının 2024-cü il fevralın 6 və 7-də Urmiya, Bonab, Ərdəbil, Təbriz və Kərəc kimi müxtəlif şəhərlərdə həbs edildiyini bildirib.

Məlumatlı bir mənbə “Human Rights Watch”-a bildirib ki, hakimiyyət ittihamları təsdiqləyən heç bir sübut təqdim etməyib və həmin şəxslərin əvvəlki fəaliyyətləri əsas gətirilib.

“Human Rights Watch”un İran üzrə tədqiqatçısı Nahid Naqşbəndi bildirib ki, İran hakimiyyəti etnik və dini azlıqların hüquqlarını müdafiə edən hər kəsi hədəf alır, onları separatçılıqla günahlandırır və əsassız ittihamlarla cəzalandırır.