Azər Qasımlının həbs müddəti daha iki ay uzadıldı.

İyunun 25-də Bakı Ağır Cinayətlər Məhkəməsində Siyasi Menecment İnstitutunun direktoru, politoloq Azər Qasımlının cinayət işi üzrə ilkin hazırlıq iclası keçirilib. Onun vəkilləri iddia edir ki, nə ortada onu ittiham edən fakt var, nə də şahid, amma o, yarım ildən artıqdır həbsdə saxlanılır.

Məhkəmədə çıxış edən Qasımlı bildirib:

“Onların iddialarını sübut edən bir dənə də dəlil yoxdur. Amma məndə həm səs yazısı, həm də mülki məhkəmə qərarı var”.

Vəkillər ev dustaqlığı və xitam istəyib

Azər Qasımlının müdafiəçiləri şüşə kabinədən çıxarılıb vəkillərinin yanında əyləşməsi, barəsində olan cinayət işinə xitam verilməsi, bu mümkün olmadıqda isə ev dustaqlığına buraxılması ilə bağlı vəsatətlər versələr də, yalnız sonuncu vəsatət rədd edilib. Digər vəsatətlərə iyulun 2-də baxılacaq.

“Əvvəl borcu etiraf edib, indi zərərçəkmişdir”

Vəkil Aqil Layıc deyib ki, Qasımlı ilə zərərçəkmiş kimi təqdim edilən Qurbanəli Yusifov arasında bir neçə ildir məhkəmə çəkişməsi var. Onun sözlərinə görə, Yusifov Mingəçevir və Şəki məhkəmələrində Qasımlıya borclu olduğunu etiraf edib:

“Guya Qasımlı onu və ailəsini öldürməklə hədələyib. Amma ortada yalnız bir mülki borc məsələsi var və bu da kommersiya mübahisəsidir. Eyni məsələ üzrə həm mülki, həm cinayət icraatı ola bilməz”.

Vəkillər hesab edir ki, Qasımlı ictimai-siyasi fəaliyyətinə görə hədəf alınıb. Onlar xatırladıblar ki, politoloq Almaniyaya akademik məqsədlə getməyə hazırlaşırmış və yetkinlik yaşına çatmayan övladları var.

Zərərçəkmiş iddiaları müdafiə edir

Zərərçəkmiş Qurbanəli Yusifov isə Qasımlının onu və ailəsini təhdid etdiyini, ona ciddi ziyan vurduğunu iddia edərək müdafiə tərəfinin vəsatətlərinə etiraz edib.

Vəkil Rövşanə Rəhimli isə zərərçəkmişin qohumlarının ifadələrinin sübut siyahısından çıxarılmasını, mülki məhkəmələrdəki audio və video yazıların əldə olunmasını istəyib. Onun sözlərinə görə, həmin materiallar Yusifovun borcu etiraf etdiyini sübut edir.

Növbəti iclas iyulun 2-də

Məhkəmə yalnız ev dustaqlığı vəsatətini rədd edib, digər məsələlərlə bağlı qərarı iyulun 2-də keçiriləcək iclasda açıqlayacağını bildirib.

Azər Qasımlı 2023-cü ilin sonunda hədə-qorxu ilə pul tələb etməkdə ittiham olunaraq saxlanılıb. O ittihamları rədd edir və həbsini siyasi fəaliyyəti ilə əlaqələndirir.