Azərbaycan gəncinə müraciət edirəm!

2 fevral Azərbaycanda Gənclər Günü kimi qeyd edilir.

Bu günün adının məhz bu cür rəsmiləşdirilməsinin səbəblərindən asılı olmayaraq biz bu günü Bəxtiyar Hacıyevin həbsxanada davam etdirdiyi aclıq aksiyasının 25-ci günü kimi qeyd edirik.

İndi Azərbaycanda heç kim üçün gizli deyil ki, onu şərləyərək həbs ediblər.
Bəxtiyar Hacıyev Azərbaycan gəncliyinin parlaq nümayəndələrindən biridir.
Mükəmməl ali təhsil almış, fəal vətəndaş mövqeyi olan, ictimai fikir liderlərindən biri kimi tanınan və qəbul edilən bir Azərbaycan gəncidir.

2 fevral gününü Azərbaycanda Gənclər Günü kimi qeyd edən hər kəs Bəxtiyar Hacıyevin, bir Azərbaycan gəncinin həbsxana divarları arxasında davam edən həyat dramını da xatırlamalı olacaq.

Özəlliklə, gənclər!
Azərbaycan gəncləri!

Sizlərdən biri olan, öz mövqeyini qorxmadan, çəkinmədən açıqlayan, Azərbaycan üçün dünyanın mütərəqqi xalqlarının özünüidarə modellərini rəva görən, açıqfikirli olduğuna görə, insan və vətəndaş haqlarını bütün dəyərlərin önündə bildiyinə görə, bütün bunları təbliğ etdiyinə görə böhtanla həbsxanaya atılan Bəxtiyar Hacıyevin sizin dəstəyinizə ehtiyacı var.

Əslində, yalnız Bəxtiyarın deyil, sizin özünüzün də geniş ictimai dəstəyə ehtiyacınız var.

Bəxtiyar Hacıyevlə bağlı baş verənlər bu zamana qədərki bütün siyasi dustaqların taleyinin təkrarıdır, bu prosesi dayandırmaq üçün ən ciddi güc həmin o ictimai rəydir ki, onu ifadə etmək, israrla bəyan etmək gərəkdir.

Bəxtiyar Hacıyevlə bağlı baş verənlər hüquq və məsuliyyət tanımayan inzibati gücün hər bir azərbaycanlıya qarşı işlədə biləcəyi planların sadəcə biridir. Azərbaycan gəncliyi bunu bilməlidir.
Hər yerdə, bütün müstəvilərdə bu zorakılığın və inzibati- siyasi özbaşınalığın dayandırlması üçün mövqe bildirmək bu prosesi dayandıra bilər.

Bu gün hüquqi məsuliyyətsizliyin qurbanı Bəxtiyar Hacıyevdir, sabah sizlərdən hər hansı biriniz ola bilərsiz.
Azərbaycan gəncliyi rəsmi və təntənəli təqvim günlərini deyil, bu rəsmiyyətin arxasında gizlədilməyən və aşkar nümayiş etdirilən aqressiyanın, vətəndaş haqlarına qarşı inzibati təcavüzün şiddətini dəyərləndirməlidir.
Buna hazır olanlar, bundan qorxmayanlar nə qədərdir?
O qədər olmalıdır ki, Bəxtiyarların üzərində hüquq və ictimai ləyaqət anlayışlarına zidd olan eksperimentləri aparmağa kiminsə cəsarəti çatmasın.
Yalnız güclü, cəsarətli cəmiyyətlər öz ləyaqətini qoruya bilər!

Azərbaycan gəncliyi bu günü bu əzmlə qeyd etməlidir və bu əzm yoxdursa, bütün rəsmi gün və ya il adlarını mənasız və şit təntənə ilə boyadılmış təqvim rəqəmi kimi qəbul edə bilərsiz.
Bəxtiyara azadlıq !

Siz də onun azadlıq haqqını tələb edin!