Bir necə gün əvvəl blogger Mehman Hüseynova müsahibə verən millət vəkili Vahid Əhmədovun səsləndirdiyi həqiqətlər bəzi yaltaq, hakimiyyət tərəfindən təyin olunan "millət vəkilləri" -i bərk narahat edib. Xalqın, millətin problemlərini ali tribunadan səsləndirməyə cəsarət edə bilməyən bəzi deputatlar indi də xalq tərəfindən sevilən və seçilən Millət vəkili Vahid Əhmədova utanmadan, həyasızcasına dil uzadır.

Bəziləri isə kimlərinsə sifarişi ilə ali tribunadan qeyrətli millət vəkilinə qarşı çıxışlar edir.

Xalq onsuz da yaxşı bilir kim kimdir. Özlərini kimlərəsə xoş göstərməyə çalışan yaltaq deputatlar tarixdə öz adlarını silinməz ləkə kimi xalq düşməni siyahısına yazırlar. O deputatlar ki, yaltaqcasına hakimiyyəti tərifləməkdən başqa heçnə bacarmır. Bir dəfə də olsun sosial problemlərdən əzilən, yoxsul, dilənçi, rəzil xalqın problemini həll etməyib. Ölkədə olan real problemləri ali tribunadan səsləndirməyib.

Parlamentdə oturan bəzi yaltaq deputatlar bilməlidir ki, Vahid Əhmədov kimi qeyrətli, vicdanlı millət vəkilləri xalqın səsi ilə Milli məclisdə oturub. Onları da xalq seçdiyi kimi, müdafiə etməyə qadirdir.