İlkin Süleymanovun etiraf videosunu yayıblar. Məhz indi yayılması təsadüf deyil. Gördülər ki, cəmiyyətdə böyük əksəriyyət hökmün ədalətsiz, onun təqsirsiz olduğunu düşünür. İnsanların fikrinə təsir göstərmək üçün…

O video məhkəmə prosesində də müzakirə olunub. İlkin deyirdi ki, hadisə yerinə aparılanda işgəncədən ayağıma ayaqqabı olmurdu, ona görə başmaq geyindirdilər. Həqiqətən də videodan görünür, yanvar ayında adamın əynində kurtka, ayağında isə başmaq…

Prokurorluq sənədlərdə İlkinin yanvarın 10-da tutulduğunu rəsmiləşdirib. Amma məhkəmədə sübut olundu ki, adamı ayın 6-dan tutublar, 4 gün polis şöbəsində onların nəzarətində olub. Hər halda, 4 gün İlkini polis şöbəsində qonaq saxlamamışdılar, özünün dediyi kimi, işgəncə altında olmuşdu…
Yanvarın 8-də onların evində axtarış aparılıb, protokol var, iş üçün əhəmiyyətli heç nə tapılmayıb…

Vəkillər məhkəmədə müstəntiqin yönləndirməsi, “demişdim ki, cinsi əlaqə olmayacaq” pıçıltısı, videoçəkiliş zamanı prokurorluğun başqa bir vəzifəlisinin müdaxiləsi və bu kimi bir çox məsələləri qaldırmışdılar…

Və nəhayət, etirafa qalanda, Tərtər hadisələrində də insanlar işgəncə altında nəinki qətl hadisəsini, hətta əsgərləri aparıb, təcavüzə məruz qoydurduğunu boynuna almağa məcbur olmuşdu. Nə oldu? 5 il 6 ay sonra bəraət almadılarmı?

Başqa bir misal, heç bir ay deyil ki, Ali Məhkəmə qətldə ittiham olunan və ortada etirafı olan başqa bir kişinin işi üzrə qərarı ləğv edib, təkrar araşdırma üçün apellyasiya məhkəməsinə qaytarıb. Adam 3 il yarımdır həbsdədir…
P.S. Bir neçə nəfər yayılan video ilə bağlı yazıb soruşdu deyə, bu statusu paylaşmağa məcbur oldum.

Ayten Memmedova