Hüquq və təhlükəsizliyimizin bütün səlahiyyətlərini özündə daşıyan Baş Prokurorluq Əvəz Zeynallının nağıllar üzərindən yaratdığı "işi" üzrə istintaq materiallarını özünün cib mətbuatına ötürüb. Onlar da eninə-boluna bu "materialları" məqalə halında mətbuatda paylaşıblar. 25 ildir tanıdığım insanı elə təqdim ediblər ki, özümü belə tərəddüd içərisinə salıblar. Amma el arasında çox dəyərli bir deyim var, "oğurluq 40 gün sürər..." Hara qədər gedəcəklər ki?.. Şəxsən mən səlahiyyətlərini aşaraq, məhkəmə prosesi gedən ərəfədə Baş Prokurorluğu yaydığı bu qarayaxmalara görə, məsuliyyətə cəlb edilməsinin tərəfdarıyam. Amma nə edəsən ki, hüquqi dövlətdə yaşamadığımız üçün haqlını haqsız duruma salmaq dövlət adından səlahiyyət daşıyan bu qurumun "vəzifəsi"nə çevrilib. Bu, onların yanına buraxılacaqmı? Əsla! Hüquqi dövlət olsaydıq başda PA-nın əvəzedilməz məmurlar toplusunun siyasi sifarişlərilə fəaliyyət göstərən baş prokuror Kamran Əliyev olmaqla, Əvəz Zeynallının həbsində xüsusi xidmətlər göstərdiyi üçün Baş Prokurorluğun Korrupsiyaya qarşı Mübarizə Baş İdarəsinin İstintaq idarəsinin rəisi vəzifəsinə yüksəlmiş Mehman Hümbətov, İstintaq idarəsinin rəis müavini Qasım Məmmədov və bu işdə istifadə olunan südəmər müstəntiq Teymur Qarayev olmaqla, cib mətbuatına, trolluğa xidmət edən hər kəs xalqın haqq səsini susdurmağa çalışdıqları üçün məsuliyyət daşımalı idi. Amma... Əməllərini unutmasınlar...
Biz haqq uğrunda mübarizənin nə olduğunu yaxşı bilirik. Bununla Azərbaycana olan sevgimizi azaldacaqlarını, bizi sındıracaqlarını düşünürlərsə, yanılırlar.
16 İyun, saat 14:00-da yenə törətmədiyimiz cinayətlər məhkəməsində olacağıq.
Dostları yanımızda, düşmənlərimizi qarşımızda görəcəyimiz bir gündür.

Məlahət Qisuri Zeynallı