Azərbaycan Respublikasının Prezidenti İlham Əliyev dekabrın 23-də Xankəndi şəhərində Qarabağ Universitetinin Biznes və iqtisadiyyat fakültəsinin yeni inşa olunmuş tədris binasının açılışında iştirak edib.

Dövlət başçısına binada yaradılmış şərait barədə məlumat verilib. Bildirilib ki, Biznes və iqtisadiyyat fakültəsi universitetin əsas struktur bölmələrindən biridir və burada hazırda 20 professor-müəllim, inzibati və texniki heyət üzvü çalışır. Fakültədə 505 tələbə bakalavriat səviyyəsində 7 ixtisas üzrə — iqtisadiyyat, maliyyə, mühasibat uçotu, menecment, dövlət və bələdiyyə idarəetməsi, beynəlxalq ticarət və logistika, turizm işinin təşkili istiqamətlərində təhsil alır.

Yeni tədris binasında 40 auditoriya, kompüter laboratoriyaları, kitabxana, oxu və akt zalları, iclas, inzibati və professor-müəllim otaqları yaradılıb. Müasir universitet konsepsiyasına uyğun layihələndirilən bina dayanıqlı inkişaf, inklüzivlik və resurslardan səmərəli istifadə prinsipləri əsasında inşa olunub.

Qeyd edilib ki, yeni bina fakültənin elmi-pedaqoji potensialının gücləndirilməsinə, tələbələrin praktiki bilik və bacarıqlarının artırılmasına, əmək bazarının tələblərinə uyğun yüksəkixtisaslı kadrların hazırlanmasına və elmi-tədqiqat fəaliyyətinin genişləndirilməsinə imkan verəcək.

Biznes və iqtisadiyyat fakültəsinin yeni binasının istifadəyə verilməsi Qarabağ Universitetində müasir kampusun formalaşdırılması istiqamətində mühüm addım olmaqla yanaşı, Qarabağ və Şərqi Zəngəzurda yüksəksəviyyəli ali təhsil ekosisteminin qurulmasına töhfə kimi qiymətləndirilir.

Hazırda Qarabağ Universitetində 6 fakültədə 27 ixtisas üzrə 2154 tələbə təhsil alır. Prezident İlham Əliyev 2024–2025-ci illərdə universitetdə aparılan işlərlə tanış olub və bir sıra tədris və infrastruktur obyektlərinin açılışında iştirak edib.